Ógeı sheshesi men onyń anasyn sabaǵan túrkistandyqqa izdeý salyndy
NUR-SULTAN. QazAqparat – Túrkistan oblysy Keles aýdanynda eki áıeldi uryp-soqqan kúdiktige izdeý salyndy, dep habarlaıdy QazAqparat Túrkistan oblysynyń Polıtsııa departamentine silteme jasap.
«Túrkistan oblysynda polıtsııa qyzmetkerleri eki áıeldi uryp-soǵý faktisi boıynsha sotqa deıingi tergeý jumystaryn bastady. Buǵan deıin áleýmettik jelide qan-josa bolǵan qart ájeı men eresek áıeldiń beınejazbalary taraǵan edi. 2019 jyldyń 15 tamyzynda Keles aýdandyq polıtsııa bólimshesine eki áıeldiń tán jaraqatymen aýrýhanaǵa túskeni habarlandy», - delingen oblystyq departament habarlamasynda.
Oqıǵa ornyna kelgen polıtseıler tamyzdyń 14-inen 15-ine qaraǵan túni Keles aýdany turǵynynyń úıge basa-kóktep kirip, ógeı sheshesi men onyń anasyn sabap, qashyp ketkenin anyqtady.
«Bul fakt QR Qylmystyq Kodeksiniń 107-baby «Densaýlyqqa qasaqana aýyrlyǵy ortasha zaqym keltirý» jáne 149-baby «Turǵynjaıǵa qolsuǵylmaýshylyqty buzý» boıynsha sotqa deıingi tergeý reestrine tirkeldi. Qazirgi ýaqytta sotqa deıingi tergeý jumystary júrip jatyr jáne onda oqıǵanyń mán-jaıy anyqtalady. Kúdiktige izdeý salyndy», - dep habarlady Túrkistan oblysynyń Polıtsııa departamenti.
