Ógeı sheshe qorlaǵan qyzdar: Soqqy izin kórgen ustazdar polıtsııaǵa habar bergen
NUR-SULTAN. QazAqparat - Túrkistan oblysy Jetisaı qalasynda ógeı shesheniń qorlyǵyn kórgen úsh qyz oqıǵasyna qatysty Bilim jáne ǵylym mınıstrligi shuǵyl is-sharalar qabyldady, dep habarlaıdy QazAqparat vedomstvonyń baspasóz qyzmetine silteme jasap.
«Túrkistan oblysynda aýyl mektebiniń muǵalimderi oqýshylardyń denesinen isik pen uryp-soǵý izderin baıqap, polıtsııa qyzmetkerlerin shaqyrǵan. Keıin aýdandyq polıtsııa bólimi qylmystyq is qozǵaǵan. Balalardy jábirlegen áıel birden polıtsııaǵa jetkizildi. Ógeı anasy balalaryn uryp-soqqan, denelerinde pyshaq izderi bar. Atalǵan is Іshki ister mınıstrligi, Bas prokýratýra, Bilim jáne ǵylym mınıstrligi tarapynan baqylaýǵa alyndy. Atalmysh fakti boıynsha tekserý jumystary júrgizilip jatyr» delingen habarlamada.
Osy oraıda Bilim jáne ǵylym mınıstri Kúlásh Shamshıdınovanyń tapsyrmasymen mınıstrdiń keńesshisi Raısa Sher jedel túrde Túrkistan oblysyna attandy.
Túrkistan oblystyq bilim basqarmasynyń aqparatyna sáıkes, soqqyǵa jyǵylǵan oqýshy úıine jiberilmeı, týǵan apasyna jetkizilip, qazirgi tańda tolyq qaýipsiz jerde.
Búgingi tańda qylmystyq kodekstiń 140-bap, 2-tarmaǵyna sáıkes qylmystyq is qozǵalyp, is sotqa jiberilgen. Sonymen qatar, qamaqqa alý túrindegi jazany oryndaý boıynsha shara qoldanylǵany belgili boldy. Ata-ana quqyǵynan tek ógeı anasyn ǵana emes, sondaı-aq ákesin de aıyrý jónindegi suraq qarastyrylyp jatyr.
