Ógeı sheshe qorlaǵan qyzdar: Mektep dırektory men synyp jetekshileri jazalanady
TÚRKІSTAN. QazAqparat - Túrkistan oblysy Jetisaı aýdanyndaǵy balalarǵa qatysty turmystyq zorlyq-zombylyq faktileri Bala quqyqtary jónindegi ýákil Sáýle Aıtpaeva, QR Bas prokýratýrasy, QR BǴM balalardyń quqyqtaryn qorǵaý komıtetiniń baqylaýyna alyndy. Bul týraly Bilim jáne ǵylym mınıstrliginiń baspasóz qyzmetine silteme jasap QazAqparat habarlaıdy.
11 sáýir kúni D.Qonaev atyndaǵy №9 orta mektebiniń basshylyǵynan Jetisaı aýdanynyń quqyq qorǵaý organdary qyzmetkerlerine 6, 7 jáne 9 synyp oqýshylaryna qatysty zańsyz áreketter týraly aqparat kelip túsken. 12 sáýirde júrgizilgen tekseris nátıjesinde aýdandyq polıtsııa bólimi QR Qylmystyq Kodeksiniń 140-baby «Kámeletke tolmaǵan balalardy tárbıeleý jónindegi mindetterdi oryndamaý» boıynsha qyzdardyń ákesine qatysty jáne QR Qylmystyq Kodeksiniń 110-baby «Azaptaý» boıynsha qyzdardyń ógeı anasyna qatysty qylmystyq is qozǵady.
«Tekserý barysynda ákesiniń birge turatyn áıelimen (qyzdardyń ógeı anasymen) zańdy nekede tirkelmegeni jáne áıeldiń bul qyzdardyń zańdy ókili bolmaǵany anyqtaldy. Tergeý is-sharalary barysynda balalarǵa fızıkalyq jáne psıhologııalyq zorlyq-zombylyq kórsetý faktileri anyqtaldy. Qazirgi kezde qyzdardyń ógeı anasy ýaqytsha ustaý ızolıatoryna qamaqqa alynǵan. Kámelet jasqa tolmaǵandardyń densaýlyq jaǵdaıyn eskere kele olardy aýdandyq aýrýhanaǵa jatqyzý týraly sheshim shyǵaryldy. Búgingi tańda balalarmen dárigerler, psıholog jáne psıhıatrlar jumys isteýde. Emdeýshi dárigerlerdiń aıtýynsha, qyzdardyń qazirgi jaǵdaıy qanaǵattanarlyq. Aýrýhanadan shyqqannan keıin qyzdardyń qaýipsizdigi úshin kámelet jasqa tolmaǵandar isteri jónindegi aýdandyq komıssııanyń sheshimimen olar týǵan ájesine jiberiledi. Qyzdardyń týǵan ájesi qazirgi tańda basqa balasynyń otbasymen turady. Sot-medıtsınalyq saraptama qorytyndysy jáne istiń basqa materıaldaryn daıyndaý nátıjeleri boıynsha qyzdardyń ákesi men ógeı anasyna qatysty is ıÝvenaldy sotqa jiberilip, úkim shyǵady» delingen habarlamada.
Balalarǵa qatysty zorlyq-zombylyqty ýaqytyly anyqtaý boıynsha jetkiliksiz jumys jasaǵany úshin aýdan ákiminiń orynbasary, aýdandyq bilim bóliminiń jetekshisi, mektep dırektory, mektep dırektorynyń tárbıe isi jónindegi orynbasary, mektep psıhologtary, áleýmettik pedagog jáne 3 synyp jetekshisine qatysty qatań tártiptik jaza qoldanylady.
18 sáýir kúni pedagogtar, ata-analar, densaýlyq saqtaý salasy men ishki ister organdary qyzmetkerleri jáne Jetisaı aýdanynyń jurtshylyǵymen ótken kezdesýde balalardyń quqyqtary men zańdy múddelerin qamtamasyz etý suraqtary talqylanyp, kámelet jasqa tolmaǵandarǵa qatysty zorlyq-zombylyqtyń aldyn alý boıynsha júıelik sharalar qabyldandy.
