Ógeı qyzyna azǵyndyq áreket jasaǵan BQO turǵyny 20 jylǵa sottaldy

ORAL. QazAqparat – BQO qylmystyq ister jónindegi mamandandyrylǵan aýdanaralyq sotynyń 26 mamyrdaǵy úkimimen Bolat Aımaǵambetov QR QK 124-baby 2-bóligimen (jas balaǵa qatysty azǵyndyq) jáne 121-baby 4-bóligimen (seksýaldyq sıpattaǵy zorlyq-zombylyq áreketi) aıypty dep tanyldy, dep habarlaıdy QazAqparat tilshisi.

Atalmysh sottyń baspasóz qyzmeti málim etkenindeı, Oral qalasynyń turǵyny B.Aımaǵambetov 2007 jyly týǵan ógeı qyzyna kúsh qoldanbaı, azǵyndyq jáne seksýaldyq sıpattaǵy zorlyq-zombylyq áreketterin jasaǵan.

Sottalýshynyń kinási jábirlenýshiniń, zańdy ókildiń, kýálardyń, sarapshylardyń aıǵaqtarymen, oqıǵa bolǵan jerdi qaraý, alý, saraptama qorytyndylarymen dáleldengen.

Prokýror Aımaǵambetovke túpkilikti 20 jyl bas bostandyǵynan aıyrý jazasyn taǵaıyndaýdy surady, jábirlenýshi tarap munymen kelisti.

Sot zań talaptaryn eskere otyryp, Aımaǵambetovke eń joǵary jaza kesti. QR QK 121-baby 4-bóligimen 15 jyl, 124-baby 2-bóligimen 7 jyl bas bostandyǵynan aıyrý jazasyn belgiledi. Bul jazalar ishinara qosylyp, túpkilikti 20 jylǵa bas bostandyǵynan aıyryldy. Ol jazasyn qaýipsizdigi eń joǵary qylmystyq-atqarý júıesi mekemesinde óteıdi.

Sonymen qatar B.Aımaǵambetov pedagogıkalyq jáne kámeletke tolmaǵandarmen jumys jasaýǵa baılanysty qyzmettermen aınalysý quqyǵynan ómir boıyna aıyryldy.

Sot úkimi zańdy kúshine engen joq.