Ógeı qyzyn soǵyp, shashynan súıregen mańǵystaýlyq turǵynǵa qatysty qylmystyq is qozǵaldy

AQTAÝ. KAZINFORM – Kámelet jasyna tolmaǵan qyzdy ógeı ákesi jurttyń kózinshe uryp-soqqan. Bul týraly kámeletke tolmaǵandardyń isteri jónindegi oblystyq komıssııanyń múshesi Dılıara Týrına málimdedi. 

D. Týrınanyń aıtýynsha, er adam áıeli men onyń 16 jastaǵy qyzyna únemi psıhologııalyq qysym kórsetip kelgen. Al oqıǵa bolatyn kúni úıge kire almaǵan soń, olardy syrtta ańdyǵan. Jasóspirim qyz dúkenge nan alýǵa shyqqanda, ony ógeı ákesi úıdiń kireberisinen ustap alǵan. Qyzdy shashynan súırep, kópshiliktiń kózinshe soqqyǵa jyqqan. 

– Ókinishke qaraı, sol kezde kýágerlerdiń eshqaısysy qyzǵa arasha túspegen. Jasóspirim qazir aýrýhanaǵa jatqyzyldy. Anasy polıtsııaǵa aryz túsirdi. Bul derek boıynsha QR Qylmystyq Kodekstiń 109-baby – «Densaýlyqqa qasaqana jeńil zııan keltirý» boıynsha qylmystyq is qozǵaldy. Іs Mańǵystaý oblystyq polıtsııa departamentiniń, kámeletke tolmaǵandardyń isteri jónindegi komıssııanyń jáne oblystyq prokýratýranyń baqylaýyna alyndy, - deıdi Dılıara Týrına.

Jábirlenýshige kámeletke tolmaǵandarǵa qoldaý kórsetý ortalyǵynyń psıhology psıhologııalyq kómek kórsetedi. Dılıara Týrına turǵyndardy mundaı oqıǵalarǵa beıjaı qaramaýǵa shaqyrdy.

– Balany, qyzdy, áıeldi urýǵa eshkimniń quqyǵy joq. Mundaı jaǵdaılar qoǵamda keń rezonans týdyryp, árbir azamat bala men áıeldiń quqyǵyn qorǵaýǵa jumylýy tıis, - deıdi ol. 

Buǵan deıin Atyraý óńirinde jyl basynan beri zorlyq-zombylyq deregimen 30 qylmystyq is tirkelgeni týraly jazǵan bolatynbyz.