Ógeı ákesinen taıaq jegen balanyń bas súıegine trepanatsııa jasaldy
ALMATY. QazAqparat – Almatyda ógeı ákesinen taıaq jep, komaǵa túsken kishkene balanyń jaǵdaıy óte aýyr. Bul týraly qalalyq Qoǵamdyq densaýlyq saqtaý basqarmasynyń baspasóz qyzmetinen málimdedi, dep habarlaıdy QazAqparat tilshisi.
Mamandardyń aıtýynsha, aýrýhanaǵa túskende balanyń basynda aýyr jaraqat bolǵan, sol jaq gemısferasynda sýbdýraldy qan uıyǵan, sýbarahnoıdaldy qan ketken, mıy isip ketken.
«Mıy dıffýzdy-aksonaldy jaraqat alǵan. Keýde qýysy organdary jaraqat alǵan. Jumsaq tinderi soǵylǵan. Balada ІІІ dárejeli dem jetispeýshiligi bar. ІІІ dárejeli travmatıkalyq shok, ІІІ dárejeli tserebraldy shok baıqalady. Shuǵyl túrde balaǵa ota jasalǵan. Balanyń bas súıegi ashylyp, sýbdýraldy gematoma alynyp tastaldy. Dál qazir bala jasandy tynys alý apparatyna qosylǵan. Jaǵdaıy aýa aýyr», - dedi dárigerler.
Jantúrshigerlik oqıǵa týraly biz habarlaǵan bolatynbyz. Polıtsııaǵa keshe keshki saǵat 16:00 shamasynda medıtsınalyq qyzmetkerler 2 jasar balanyń es-tússiz túskenin aıtqan.
Polıtsııa eń aldymen balanyń 34 jastaǵy ógeı ákesinen suraq-jaýap alǵan. Basynda ol bala qulap qaldy degen ýáj aıtty. Keıinnen tergeý materıaldarynyń arqasynda uldy ógeı ákesi urǵany anyqtaldy. Belgili bolǵandaı, balanyń anasy ol kezde jumysta bolǵan. Jylaǵan balany jubata almaǵan ógeı ákesi uryp-soqqan.
