Ógem ózeniniń sýyn el ıgiligine paıdalaný jobasy ázirlenip jatyr — Nurlan Aldamjarov
ASTANA. KAZINFORM — Saıram-Ógem memlekettik tabıǵı qoryǵyndaǵy Ógem ózeniniń sýy 100 paıyz Qazaqstan aýmaǵynda qalyptasady. Alaıda bul sý búgingi tańda negizinen Ózbekstan aýmaǵyndaǵy egistik alqaptardy sýarýǵa baǵyttalǵan.
Osyǵan baılanysty elimizdiń ońtústigindegi Saryaǵash, Keles, Maqtaaral, Shardara jáne Jetisaı aýdandarynda turatyn 1 mıllıonǵa jýyq halyq sý tapshylyǵyn sezinip otyr. Bul másele Ortalyq kommýnıkatsııalar qyzmetinde ótken baspasóz konferentsııasynda kóterildi.
Jýrnalısterdiń saýalyna jaýap bergen QR Sý resýrstary jáne ırrıgatsııa vıtse-mınıstri Nurlan Aldamjarov Ógem ózeniniń sýyn el ishinde paıdalaný baǵytynda naqty jumystar júrgizilip jatqanyn málimdedi.
— Ógem ózeniniń sýyn óńirdi sýmen qamtamasyz etý úshin tehnıkalyq-ekonomıkalyq negizdeme ázirlenip jatyr. Ózen qoryq aımaǵynda ornalasqandyqtan, sýdy qubyr arqyly tartý úshin arnaıy tehnıkalyq sheshimder qajet. Qurylys jumystaryn 2026 jyly bastaýdy josparlap otyrmyz. Joba aıasynda Jańabazar aýmaǵynda úlken sý rezervýary salynady. Sol rezervýar arqyly Qazyǵurt, Keles, Saryaǵash, Maqtaaral jáne Jetisaı aýdandaryna magıstraldyq sý qubyry tartylatyn bolady. Qazirgi tańda tıisti kelisimderge qol qoıyldy, al tehnıkalyq-ekonomıkalyq negizdeme 2025 jyldyń sońyna deıin daıyn bolady, — dedi vıtse-mınıstr.
Sonymen qatar Nurlan Aldamjarov Ógem ózeniniń sýy qazir de belgili bir deńgeıde el aýmaǵynda paıdalanylyp otyrǵanyn atap ótti.
— Ógem ózeni Qazaqstan aýmaǵynan bastaý alyp, Shyrshyq ózenine quıady. Bul sý ary qaraı Shyrshyq ózeni arqyly aǵyp, sol jerde bólý jumystary júrgiziledi. Osy arqyly sý Zah kanaly, Úlken Keles magıstraldy kanaly jáne Hanym kanaly arqyly Qazyǵurt, Keles jáne Saryaǵash aýdandaryna jetkiziledi. Osy arnalar arqyly keletin sýdyń quramynda Ógem ózeniniń úlesi de bar, — dep túsindirdi vıtse-mınıstr.
Buǵan deıin sý tapshylyǵy jaǵdaıynda Shardara qoımasyndaǵy artyq sý qalaı bólinetinin jazǵanbyz.