Ógem ózeni OQO-nyń úsh aýdanyn aýyz sýmen qamtamasyz etedi
ASTANA. QazAqparat - Ońtústik Qazaqstan oblysy Qazyǵurt, Saryaǵash jáne Maqtaaral aýdandarynyń 700 myńǵa tarta halyqty sapaly aýyz sýmen qamtamasyz etý máselesi aldaǵy 5 jylda tolyq sheshimin tabady. Jergilikti bılik atalǵan máseleni Ógem ózenin aýyz sý retinde paıdalaný arqyly túpkilikti sheshýge bel býyp otyr, dep habarlaıdy oblys ákiminiń baspasóz qyzmeti.
Osy maqsatta 15 aqpanda Qazaqstan men Ózbekstan Úkimeti ókilderiniń ekijaqty yntymaqtastyqty jetildirý máseleleri jónindegi birlesken jumys toby basqosqan bolatyn.
Atalǵan májiliste Ógem ózeninen kólemi sekýndyna 3-3,5 tekshe metrge deıin sýdy buryp atalǵan aýdandardyń turǵyndaryna aýyz sý retinde paıdalaný máselesi qaralyp, oń sheshimin tapty. Ol úshin Qazyǵurt aýdanynyń Ógem aýyly tusynan Ógem ózeninen qubyr arqyly sý burý jumystary júrgizilýi tıis.
«Eger qazirgi kelissózder nátıjeli aıaqtalsa, joǵaryda atalǵan problemany túpkilikti sheshýge bolady»,- deıdi oblystyq energetıka jáne turǵyn úı kommýnaldyq sharýashylyǵy basqarmasynyń basshysy Marǵulan Maraıym.
Aıta keteıik, Ógem ózeniniń basym bóligi Qazaqstan Respýblıkasy aýmaǵynda ornalasyp kórshiles Ózbekstan Respýblıkasynda ishinara ornalasqan transshekaralyq ózenge jatady.
Budan bólek, qazir oblysta jer asty sý qoryn anyqtaý jumystary júrgizilip jatyr. Jalpy óńirde sý qoryn anyqtaýdy qajet etetin 383 eldi meken bolsa, búgingi tańǵa sonyń 244-inde izdeý-barlaý jumystary aıaqtalǵan. 2017 jyly 34 eldi mekende, al 2019 jylǵa deıin qalǵan 105-inde tıisti jumystar atqarylady dep kútilýde. Bul baǵytqa 1,6 mlrd teńge baǵyttalǵan.
Sondaı-aq bıyl jańadan 10 eldi mekendi ortalyqtandyrylǵan aýyz sýmen qamtý jumystary júrgizilýde. Nátıjesinde aýyz sýmen qamtylǵan eldi mekender sany 628-ge jetkiziletin bolady. Bul óńirdegi turǵyndardy qamtý deńgeıin 74,4%-ǵa kóteredi.
Jalpy 2020 jylǵa 702 eldi mekenderge aýyz sý júıesin júrgizip, turǵyndardyń qamtý deńgeıin 83,2% jetkizý josparlanýda. Bul rette aýyz sýdy turǵyndarǵa úzdiksiz 24 saǵat berýge nazar aýdarylatyn bolady.
