Ogaıdyń maqsaty «Jetisý» komandasyn premer-lıgaǵa qaıtarý
TALDYQORǴAN.QazAqparat - «Jetisý» fýtbol komandasy ótken jyly el chempıonatynan tys qalǵan bolatyn. Bıyl birinshi lıgada óner kórsetetin jetisýlyq teńbil dop sheberleriniń negizgi maqsaty premer-lıga sapyna qaıta oralý, dep habarlaıdy QazAqparat tilshisi.
Osy maqsatta Almaty oblysynyń ákimi Amandyq Batalov komandaǵa bilikti bapker etip Dmıtrıı Ogaıdy taǵaıyndaǵan bolatyn. D.Ogaı buǵan deıin «Ertis», «Tobyl» komandalaryn chempıondyqqa jetkizgen. Osyndaı jetistikke jetken tájirıbeli bapkerdi arnaıy shaqyrtqan óńir basshysy «Jetisý» komandasyn jaqsy kórsetkishke jetkizýin tapsyrǵan edi.
«D.Ogaıdyń maqsaty - «Jetisý» fýtbol komandasyn premer-lıga sapyna qaıta qosý. Ózderińizge belgili, sońǵy eki jylda bul komandanyń baǵy asa janbady. 2015 jyly áýpirimdep júrip, premer-lıgada qalǵanyn fýtbol jankúıerleri jaqsy biledi. Al 2016 jyly olar el chempıonaty qatarynan shyǵyp qaldy. Endi D.Ogaı oblys ákiminen naqty tapsyrma aldy. Birinshi lıgada top jaryp, premer-lıgaǵa qaıta oralýlary tıis», dedi Almaty oblystyq dene shynyqtyrý jáne sport basqarmasynyń basshysy Turatbek Sharapıev.
Sondaı aq basqarma basshysynyń sózinshe, «Jetisý» fýtbol klýbynyń salyq aldynda da tólenbegen qaryzdary bolǵan. Qazir ol másele de sheshimin tapqan. Endi óńir basshynyń qoldaýyn kórip otyrǵan fýtbol komandasy atqarylǵan úmitti aqtaıdy degen senim bildirýde.
Qazir «Jetisý» fýtbol komandasy Túrkııada oqý-jattyǵý jıyndaryn ótkizip, jaqynda elge oralady.
