Ofshorlyq aımaqtardan kapıtaldy qaıtarý úshin raqymshylyq jarııalana ma – Úkimet basshysynyń jaýaby

ASTANA. KAZINFORM – Premer-Mınıstr Oljas Bektenov Májilis depýtattarynyń ofshorlyq aımaqtardan jáne sheteldik ıýrısdıktsııalardan kapıtaldy qaıtarý úshin raqymshylyq jarııalaýǵa qatysty saýalyna jaýap berdi.

- 2001 2014 jyldar kezeńinde Qazaqstanda kapıtaldy jarııa etýdiń úsh kezeńi ótkizildi. Onyń qorytyndysy boıynsha bıýdjetke 6,674 trln teńge, onyń ishinde birinshi kezeńde – 70 mlrd teńge, ekinshi kezeńde – 904 mlrd teńge jáne úshinshi kezeńde 5,7 trln teńge tústi. Ofshorlyq aımaqtardan jáne basqa da sheteldik ıýrısdıktsııalardan kapıtaldy qaıtarý úshin raqymshylyq jasaý týraly usynys eldiń qarjylyq ornyqtylyǵyn nyǵaıtý jáne ınvestıtsııalyq áleýetin arttyrý jónindegi yqtımal quraldardyń biri sanalady, - dedi Premer-Mınıstr jaýabynda.

Sonymen birge Úkimet basshysy bul másele keshendi ári salmaqty tásildi talap etetindigine nazar aýdartady.

- Raqymshylyq jasaý kezinde jasalǵan qylmystyq jazalanatyn is-áreketterdiń, ásirese, eger olar uıymdasqan qylmystyq toptyń quramynda jasalǵan bolsa ne terrorıstik árekettermen, esirtki qylmystarymen jáne basqa da aýyr quqyq buzýshylyqtarmen baılanysty bolsa, aýyrlyǵyn eskerý qajet. Sonymen qatar tórelik daýlardyń táýekelderin, halyqaralyq kelisimderdiń saqtalýyn, sondaı-aq qaıtarylýǵa jatatyn aktıvter ornalasqan elderdiń ulttyq zańnamasyn eskere otyryp, yqtımal qarjylyq shyǵyndardy eskerý kerek. Aıtylǵandy eskere otyryp, ofshorlyq aımaqtardan jáne sheteldik ıýrısdıktsııalardan kapıtaldy qaıtarý úshin raqymshylyq jarııalaý týraly másele muqııat ári jan-jaqty taldaýdy talap etedi, - dedi Oljas Bektenov.

2026 jylǵy 1 qańtardan bastap baqylanatyn sheteldik kompanııalarǵa salyq salý qaǵıdalaryn qosa alǵanda, qosymsha salyqtyq tetikterdi engizý josparlanyp otyr.