Ofıtserlik borysh: zapastaǵy ofıtserlerdi shaqyrýdyń tártibi qandaı

ASTANA. KAZINFORM – Qazaqstannyń Qarýly Kúshteri men ózge de áskerı qurylymdaryndaǵy ofıtserler quramyn tolyqtyrý jumystary jalǵasyp jatyr.

Bıyl áskerı kafedrany támamdap, zapasta júrgen azamattar qaıtadan sapqa turmaq. QR QK Bas shtaby Uıymdastyrý-jumyldyrý jumystary departamentiniń aǵa ofıtseri, polkovnık Albert Bekmuhanov shaqyrýdyń maqsaty men erekshelikterin túsindirdi.

Polkovnık Bekmuhanovtyń aıtýynsha, bul – Ata zań men «Áskerı qyzmet jáne áskerı qyzmetshilerdiń mártebesi týraly» zań aıasynda júzege asatyn dástúrli shara. Bıylǵy shaqyrýdyń basty nysanasy – áskerı kafedrany bitirgen, biraq áli qyzmet ótkermegen jas ofıtserler.

– Zapastaǵy ofıtserler Qarýly Kúshterge, Tótenshe jaǵdaılar mınıstrligine, Ulttyq ulanǵa jáne Shekara qyzmetine 2 jyl merzimge shaqyrylady. Olar negizinen baılanysshy, artıllerıst, tank jáne medıtsına mamandary sııaqty suranysqa ıe mamandyqtar boıynsha irikteledi. Jas shamasyna qaraı shekteýge kelsek, jalpy ofıtserler 29 jasqa deıin, al medıtsına mamandary 32 jasqa deıin shaqyrylady, – deıdi polkovnık Jibek Joly telearnasynyń «Bugin LIVE» baǵdarlamasynda.

Kóptegen azamattardy «otbasy jaǵdaıyna baılanysty bosatylamyn ba?» degen suraq mazalaıtyny anyq. Alaıda, bul máselede talap qatańdaý.

– Zapastaǵy ofıtserler úshin «bir balasy nemese eki balasy bar» degen jeńildik júrmeıdi. Olar tek densaýlyq jaǵdaıyna baılanysty nemese magıstratýra, doktorantýrada oqýyn jalǵastyrǵan jaǵdaıda ǵana keıinge qaldyrý quqyǵyn paıdalana alady, – dep atap ótti Albert Bekmuhanov.

Sonymen qatar, polkovnıktiń aıtýynsha, eki jyl ishinde ofıtserler úlken áleýmettik qoldaý alady. Áskerı qyzmetke shaqyrylǵan ofıtserler kelisimshart negizinde jumys isteıtindermen teń quqyly.

– Árbir otbasy múshesine aımaqqa baılanysty arnaıy esepshotqa qarjy aýdarylady. Kıim-keshek jáne medıtsınalyq tekserilý tolyqtaı memleket esebinen qamtamasyz etiledi. Sondaı-aq eger qyzmet orny 100 shaqyrymnan alys jerge aýyssa, ofıtserge eki laýazymdyq jalaqy, al otbasy múshelerine jarty jalaqy mólsherinde ótemaqy tólenedi, – deıdi ol.

Aıta keteıik, buǵan deıin bıyl elimiz boıynsha 850-den astam zapastaǵy ofıtserdi áskerı qyzmetke shaqyrý josparlanyp otyrǵanyn habarlaǵan edik.