Ofıtserlerdi attestattaý jańa úlgide ótetin bolady - QR QM
Ony QR QM Kadrlar departamentiniń mamandary ázirledi jáne tikeleı attestattaýdan ótetin ofıtserdiń komandıri jaýap beretin 80 suraqtan turatyn júıe negizinde qurylǵan. Suraqtar attestattalýyshynyń bilim deńgeıi men kásibı daǵdysy, onyń áskerı tártibi jáne tipti otbasy men turmystaǵy minez-qulqy týraly málimetterden turady. Jaýaptar bes baldyq shákil boıynsha qoıylady. Odan keıin barlyq baǵalar boıynsha biryńǵaı reıtıng qorytyndysy shyǵarylady. Soǵan baǵdarlana otyryp, QR QM kadrlyq qyzmeti joǵary áskerı laýazymǵa jáne ataqqa usyný úshin qajet ofıtserdiń biliktiliginiń sáıkes kelýi, qabilettiligi men áleýetiniń bolýy týraly tolyq sıpattama qalyptastyrady. Mamandardyń pikirinshe, atalǵan joba ofıtserlerdiń shynaıy jáne áleýetti múmkindikteri týraly anaǵurlym dáıekti málimet alýǵa múmkindik beredi jáne sózsiz, jeke quramnyń kásibı turǵyda ósýine yqpal etedi. Baǵalaýdyń mundaı júıesi birneshe jyldar boıy Túrkııa men AQSh-tyń Qarýly Kúshterimen is júzinde sátti qoldanylyp júr. Elimizde ofıtserler quramynyń kezekti attestattalýy sheńberinde Qurlyq áskerleri men Áýe qorǵanysy kúshteriniń tórt áskerı bóliminiń bazasynda alǵash ret synamalandy. Osy jyly Qarýly Kúshterdiń ofıtserler korpýsynyń josparly attestattalýy 2015 jylǵy qańtardyń 12-i men qarashanyń 1-i aralyǵynda eki kezeńde ótetinin esterińizge sala keteıik. 2015 jylǵy qańtardyń 12-i men maýsymnyń 1-i aralyǵynda batalon (dıvızıon), bólim komandırleri jáne olardyń orynbasarlary laýazymdarynda áskerı qyzmet ótkerip júrgen ofıtserler, sondaı-aq qyzmette jáne jeke minez-qulqynda eleýli kemshilikteri bar ofıtserler ótti. Ekinshi kezeńde 2015 jylǵy maýsymnyń 1-nen qarashanyń 1-ne deıin barlyq qalǵan ofıtserler quramy attestattaýdan ótetin bolady, dep habarlaıdy QR QR baspasóz qyzmeti.