Ofıtserler úıi aldyndaǵy plıtkalar ne úshin alynýda: Almaty ákimdigi túsindirdi

ALMATY. QazAqparat – Ofıtserler úıiniń jóndelýine jáne plıtkalardyń alynyp tastalýyna Almaty ákimdiginiń eshqandaı qatysy joq. Bul týraly Medeý aýdanynyń ákimi Erkebulan Orazalın málim etti, dep habarlaıdy QazAqparat tilshisi.

«Men 28 gvardııalyq-panfılovshylar atyndaǵy saıabaqtyń shyǵys jaǵynda ornalasqan Ofıtserler úıi ǵımaratynyń aldyndaǵy bólshektelgen plıtkalarǵa qatysty áleýmettik jelilerdegi vıdeolarǵa túsinik bergim keledi. Aıta keterligi, Almaty ákimdigi bul ǵımarattyń teńgerim ustaýshysy emes, ol Qorǵanys mınıstrligine vedomstvolyq baǵynysty uıymnyń menshiginde. Tipti, ákimdik júrip jatqan jumystarǵa tapsyrys berýshi de emes»,- dedi Erkebulan Orazalın.

Ákimniń aıtýynsha, jóndeý jumystary aıaqtalǵan soń plıtkalardy ornyna qaıta tóseý josparlanǵan.

«Plıtkalardyń jasyl aımaqqa uqypsyz qoıylýyna baılanysty búgin merdigerlik uıymǵa ákimshilik aıyppul salyndy. Endi ony jaıaý júrginshiler bóligine muqııat aýystyryp, aldaǵy kúnderi qaıta tóseýge kirisedi. Barlyq almatylyqtarǵa aıtarym, mundaı beıneúndeýlerdi jarııalamas buryn, júrip jatqan jumystar týraly shynaıy aqparat alý úshin ákimdikke habarlasýdy suraımyn»,- dedi ol.

Qazirgi ýaqytta Ofıtserler úıi ǵımaratynyń shatyryna jáne jertólesine kúrdeli jóndeý jumystary júrgizilýde (jalpy alańy – 5,5 myń sharshy metr).