Offshorlyq ıýan baǵymy quldyrap barady

ASTANA. KAZINFORM – AQSh pen Qytaı arasyndaǵy saýda soǵysy kúrt shıelenisken tusta, resmı Beıjińniń ulttyq valıýtaǵa baqylaýdy bosańsytýy nátıjesinde offshorlyq ıýan baǵamy tarıhı tómen deńgeıge quldyrady.

Lianhe Zaobao basylymynyń habarlaýynsha, 8 sáýir kúni Nıý-Iork saýda sessııasynda offshorlyq ıýan dollarǵa shaqqanda bir sátke 0,9%-ǵa tómendep, 1 AQSh dollary 7,4141 ıýanǵa baǵalanǵan. Osylaısha naqty aıyrbas baǵamy boıynsha rekordtyq mınımým jańardy.

Sol kúni Qytaı Halyq banki ıýanniń resmı ortasha baǵamyn 1 AQSh dollaryna 7,2038 ıýan deńgeıinde belgiledi — bul 2023 jyldyń qyrkúıeginen bergi eń álsiz kórsetkish.

Osylaısha Tramp Aq úıge qaıta oralǵannan beri ıýanniń resmı baǵamy alǵash ret 7,20 deńgeıinen tómendep otyr. Іshki naryqtaǵy ıýan baǵamy da 2023 jyldyń qyrkúıeginen bergi eń tómengi kórsetkishti kórsetti.

- Bizdiń boljaýymyzsha, aldaǵy ýaqytta ıýan baǵamy jyldam qunsyzdanýǵa tıis. Qytaı bıligi ortasha baǵam arqyly aıyrbas baǵamyna kóbirek ıkemdilik berýge nıetti ekenin tuspaldap otyr, - deıdi Wells Fargo banki makrostrategııa jáne damýshy naryqtar bóliminiń dırektory Arýp Chatterdjı.

Onyń aıtýynsha, bul baqylaýda bolatyn úzdiksiz qunsyzdaný úderisi bolmaq. Sóıtip offshorlyq ıýan baǵamy 1:7,50 nemese odan da tómen deńgeıge deıin quldyrraýy múmkin.

JPMorgan bankiniń valıýta naryǵy boıynsha taldaýshysy Tıffanı Vannyń aıtýynsha, Qytaı Halyq bankiniń kelesi qorǵanysty qaı deńgeıden quratyny áli belgisiz. Biraq, shek qalaıda burynǵysynan joǵary bolady. Onyń pikirinshe, ıýan baǵamy 7,40 deńgeıine deıin quldyraýy múmkin.

Qytaıdyń Ortalyq banki transshekaralyq operatsııalarda ıýan paıdalanýdy yntalandyrady.