Offshorlyq aımaqtar tizbesinen AQSh-tyń bir shtaty men Lıhtenshteın shyǵaryldy
Qarjy naryǵyn retteý jáne damytý agenttigi «Ashyq NQA» portalynda offshorlyq aımaqtardyń tizbesin belgileý týraly qaýly jobasyn kópshilik talqylaýyna shyǵardy, dep habarlaıdy Kazinform.
«Bank pen saqtandyrý qyzmetiniń, baǵaly qaǵazdar rynogynyń kásibı qatysýshylary qyzmetiniń jáne baǵaly qaǵazdar rynogynda lıtsenzııalanatyn basqa da qyzmet túrleriniń, aktsıonerlik ınvestıtsııalyq qorlar men mıkroqarjylyq qyzmetti júzege asyratyn uıymdar qyzmetiniń maqsattary úshin offshorlyq aımaqtardyń mynadaı tizbesi belgilensin», - delingen qujat jobasynda.
Atap aıtqanda, qaýlynyń qoldanystaǵy redaktsııasyna 53 el kirgen. Usynylyp otyrǵan tizbede AQSh-tyń Delaver shtaty men Lıhtenshteın Knıazdigi túsip qalǵan.
Delaver shtatynyń agenttik tiziminen shyǵarylýyna Halyqaralyq valıýta qorynyń, Aqshany jylystatýǵa qarsy kúrestiń qarjylyq sharalaryn ázirleý tobynyń, sondaı-aq Ekonomıkalyq yntymaqtastyq jáne damý uıymynyń resmı veb-saıttarynda jarııalanǵan aqparat negiz bolyp otyr. Onyń ústine, 2024 jyldyń 1 qańtarynda Amerıka Qurama Shtattarynda Korporatıvtik ashyqtyq týraly zań kúshine enedi. Ol zań kompanııalardy ózderiniń benefıtsıar ıeleri týraly aqparatty jáne kompanııanyń menshik quqyǵyndaǵy kez kelgen jyl saıynǵy ózgerister týraly aqparatty AQSh Qarjy mınıstrliginiń Qarjylyq qylmysqa qarsy kúres júıesine jiberip otyrýǵa mindetteıdi.
Al Lıhtenshteın Knıazdigi Eýropalyq Odaqtyń tórtinshi dırektıvasy boıynsha, qarjy uıymdarynyń anonımdi shottardy ashýyna tyıym salyp, qarjylyq uıymdarǵa qatysty tıisti tekserýler júrgize bastady. Sondaı-aq shottardyń ıeleri men benefıtsıar ıelerine tekserý talabyn engizdi.
