Odessa kolledjindegi órt: Vladımır Zelenskıı 8 jeltoqsandy qaraly kún dep jarııalady
KIEV. ÝKRINFORM-QazAqparat – Ýkraına Prezıdenti Vladımır Zelenskıı adam ólimine alyp kelgen Odessa kolledjinde bolǵan órtke baılanysty 2019 jyldyń 8 jeltoqsanyn elde qaraly kún dep jarııalaý týraly sheshim qabyldady, dep habarlaıdy «QazAqparat» HAA Ýkrınform-ǵa silteme jasap.
«Búkil Ýkraınada aza tutý kúninde: memlekettik organdardyń, jergilikti bılik organdarynyń, memlekettik kásiporyndardyń, mekemeler men uıymdardyń úılerinde jáne ǵımarattarynda Ýkraınanyń Memlekettik Týy túsirilsin; oıyn-saýyq jáne kontserttik sharalardan bas tartylsyn, teledıdar men radıo baǵdarlamalaryna tıisti ózgerister engizilsin», - delingen Prezıdent Jarlyǵynda.
Vladımır Zelenskıı bul sheshimine Facebook-te pikir qaldyrdy.
«Osy qaıǵyly oqıǵa barlyq sheneýnikter, basshylar, barlyq Ýkraına azamattary úshin sabaq bolsyn. Ómir - árqaısymyzdyń qolymyzda bar eń qundy nárse. Adam ómiri - bul eldiń eń basty qundylyǵy. Olardyń ómirin saqtaý - memlekettiń birinshi kezektegi mindeti. Adamdar maıdanda jan qıyp jatsa aýyr deımiz. Al beıbit qalada, bireýdiń qatelikteri nemese nemquraıdylyq saldarynan adamdardyń qaıtys bolýy eki ese aýyr», - dep atap ótti memleket basshysy.
Eske sala keteıik, 4 jeltoqsanda Odessanyń Ekonomıka, quqyq jáne qonaq úı men meıramhana bıznesi kolledjinde órt boldy. Qazirgi ýaqytta órtten jeti adamnyń qaza tapqany belgili boldy.
