Odaqtastyq deklaratsııasy qazaq pen tájik halqynyń múddelerine tolyq jaýap beredi - Memleket basshysy
«Sizdiń saparyńyzdyń elderimiz arasyndaǵy dıplomatııalyq qatynastardyń 30 jyldyǵyna dóp kelýiniń sımvoldyq máni bar. Osy jyldar ishinde qazaq-tájik yntymaqtastyǵy ǵasyrlar boıǵy dostyq pen strategııalyq áriptestik rýhynda turaqty damı otyryp, eleýli ilgerileýge qol jetkizdi. Úkimetterdiń senimdi saıası dıalogi men úılestirilgen jumysynyń arqasynda ol dıalog únemi sapaly jańa mazmunmen tolyqtyrylyp keledi. Buǵan búgin qol qoıylǵan odaqtastyq ózara is-qımyl týraly deklaratsııa dálel bola alady. Qujat bizdiń halyqtardyń baıyrǵy jáne odan ári jaqyndasýǵa degen ózara umtylysty kórsetedi. Deklaratsııa saıası, saýda-ekonomıkalyq, mádenı-gýmanıtarlyq baılanystardy jandandyrýǵa baǵyttalǵan naqty sharalardy qamtıdy», - degen Prezıdent Tájikstan basshysy Emomalı Rahmonǵa qazaq-tájik qarym-qatynastaryn tereńdetip, jan-jaqty damytýǵa qosqan úlesi úshin alǵys bildirdi.
«Men kelissózderdiń nátıjelerin joǵary baǵalaımyn, bul kelissózder senimdi ári dostyq sıpatta boldy jáne eki el arasyndaǵy yntymaqtastyqtyń mańyzdy kezeńine jol ashty.
Sapar qorytyndysy elderimiz arasyndaǵy yntymaqtastyqtyń erekshe sıpaty bar ekenin jáne keleshegi zor ekenin taǵy bir aıqyndady. Saýda-ekonomıkalyq ózara is-qımyldy nyǵaıtý basym mindet bolyp aıqyndaldy. Birlesken kúsh-jigerdiń arqasynda byltyr ekijaqty taýar aınalymy 1,4 mlrd dollardy qurady», - dedi Memleket basshysy.
Buǵan deıin habarlaǵanymyzdaı, Aqordada Qazaqstan Respýblıkasynyń Prezıdenti Qasym-Jomart Toqaev pen Tájikstan Prezıdenti Emomalı Rahmonnyń kezdesýi ótti.
Qazaqstan men Tájikstan arasyndaǵy yntymaqtastyqty odaqtastyq deńgeıine kóterý týraly deklaratsııaǵa qol qoıyldy.
Aıta ketsek, keshe Prezıdent Qasym-Jomart Toqaev Qazaqstanǵa memlekettik saparmen kelgen Tájikstan Prezıdenti Emomalı Rahmondy elorda áýejaıynda qarsy alǵan bolatyn.
