Obyrdan kóz jumǵan jumysshy balalardy emdeýge 11 mln dollardy ósıet etip qaldyrdy
ASTANA. QazAqparat - Amerıkanyń Vashıngton shtatynda 64 jasynda obyrdan qaıtys bolǵan qarapaıym áleýmettik jumysshy Alan Neıman aýrý balalarǵa kómek kórsetetin qaıyrymdylyq qoryna 11 mıllıon dollardy ósıet etip qaldyrdy, dep habarlaıdy Fox.
Neıman mundaı qarajatty jınaý úshin barynsha únemshil bolǵan. Dostarynyń aıtýynsha, aqsha kóbirek qajet jandar bar ekenin kórgen Neıman ózine aqsha jumsaýdy doǵarǵan. Óz balalary bolmaǵanymen búldirshinderdi óte jaqsy kórgen.
11 mıllıon dollar jınaý úshin Neıman úsh jumysta qatar eńbek etken. Onyń ústine oǵan ata-anasynan mura bop qalǵan azyn-aýlaq qarajat ta bolǵan. Ómiriniń sońynda búkil qarajattaryn Neıman qaıyrymdylyq qorlaryna ósıet etip qaldyrdy.
Neımandy biletinder ony naǵyz er dep ataıdy.
