Obyrdan bolatyn ólim dınamıkasy tómendedi – Densaýlyq mınıstrligi

AQTAÝ. QazAqparat - Mańǵystaýda onkologııalyq aýrýlarǵa shaldyqqandardyń basqa jaqqa baryp em izdeýi ótken jyldarmen salystyrǵanda 3 esege azaıǵan, dep habarlaıdy QazAqparat tilshisi.

Óńirde obyr aýrýymen 4964 mańǵystaýlyq dıspanserlik esepke alynǵan. Іsiktiń basym bóligi sút bezi, jatyr moıny isigi, óńesh, asqazan jáne ishek joldarynan anyqtalǵan.

«Ǵylymı deńgeı óspeıinshe jaqsy jumys atqarý múmkin emes. Sebebi qazirgi tańdaǵy medıtsınalyq qural-jabdyqtardyń ózine talap óte joǵary. Kez kelgen adam jumys jasaı almaıdy. Barlyq ındekatorlar, naýqastardy tabý, olardy emdeý bolsyn, barlyq jaǵy bizde jolǵa qoıylǵan. Basqa jaqqa ketetin naýqastardyń sanyn azaıttyq. 3 esege deıin azaıtylyp otyr. Oblysymyzda KT, MRT apparattary jetedi»,- dedi Mańǵystaý oblystyq onkologııalyq dıspanserdiń basshysy Nurlan Jarıev.

Aıta keteıik, óńirdegi onkologııalyq dıspanserde búginde 60-qa jýyq maman qyzmet etedi.

Densaýlyq saqtaý mınıstrliginiń habarlaýynsha, onkologııalyq naýqastardyń jartysynan kóbi (53,4%) bes jyldyq ómir súrý sheginen asady jáne bul kórsetkish jyl saıynǵy oń dınamıkaǵa ıe. Obyrdan bolatyn ólim-jitimniń tómendeý dınamıkasy 17,3%-dy quraıdy. Eger 2021 jyly ólim-jitim 368 jaǵdaıdy nemese 100 myń adamǵa shaqqanda 50,5-ti qurasa, 2022 jyly - 312 jaǵdaıdy nemese 100 myń turǵynǵa shaqqanda 41,3 jaǵdaıdy qurady.