Obyr dertine áıelderge qaraǵanda erler kóp shaldyǵady
KÓKShETAÝ. QazAqparat - Aqmola oblysynda onkologııalyq aýrý kóbine 55-70 jas aralyǵynda jıi kezdesedi. Onyń 50,1 paıyzy - erlerdiń úlesinde, dep habarlaıdy QazAqparat tilshisi «Áleýmettik medıtsınalyq saqtandyrý qoryna» silteme jasap.
Vedomstvonyń málimetinshe, sońǵy birneshe jyl boıy obyr derti kósh bastap tur. 2018 jyly obyr dertine shaldyǵý boıynsha - 258, sút bezi obyry - 229 jáne asqazan obyry boıynsha 149 oqıǵa tirkeldi. Budan keıin teri jáne toq ishek obyry jıi kezdesedi.
Al, erler arasynda obyr dertine shaldyǵý boıynsha - 205 oqıǵa, asqazan obyry - 109 fakti tirkeldi. Budan keıin erkektik bez, teri jáne as qorytý isigi de jıi kezdesedi.
«Keýde hırýrıgııasy bólimshesi jylyna shamamen 300 ota jasaıdy. Ókpe obyry bizdiń oblysta ǵana emes, respýblıka jáne dúnıejúzi boıynsha kósh bastap tur. Munyń basty sebebi - ókpedegi aýyrsyný retseptorlarynyń joqtyǵy. Bul jaman dertke shaldyqqan adam ókpedegi isik ulǵaıyp, syrtyna shyqqan kezde ǵana aýrýdy seze bastaıdy. Bul ókpe obyrynyń úshinshi-tórtinshi deńgeıi, ıaǵnı bul kezde adamnyń emdelýine múmkindik múldem bolmaıdy. Jalpy, obyrdyń kez kelgen túri qaýipti. Bastapqy kezde aýrýdyń eshqandaı belgileri baıqalmaıdy. Tek profılaktıkalyq medıtsınalyq tekseris jáne skrınıng arqyly ǵana erte bastan anyqtaýǵa bolady», deıdi Aqmola oblystyq kópbeıindi aýrýhanasynyń keýde hırýrgııa bólimshesiniń meńgerýshisi Marlen Atambaev.
Áıelder aýrýyna keletin bolsaq, birinshi orynda sút bezi obyry - 2018 jyly 229 oqıǵa, odan keıin jatyr obyry - 86, teri obyry - 82, ókpe obyry - 53 jáne asqazan obyry - 40 oqıǵa. Jatyr obyryna ushyraǵan 86 áıeldiń 65-de (76 paıyzy) skrınıng arqyly anyqtaldy.
«Memleket skrınıngti úsh baǵyt boıynsha tegin ótýge múmkindik usynyp otyr. Onyń ishinde 40 jáne 70 jas aralyǵyndaǵy áıelder sút bezi mammografııasy, 30 jáne 70 jas aralyǵyndaǵy áıelder jatyr obyryna dıagnostıka, 50 jáne 70 jas aralyǵyndaǵy erkekter men áıelder toq jáne aşy ishek obyryna skrınıngten óte alady. Skrınıngke joldamany turǵylyqty jeri boıynsha emhanadan alýǵa bolady», - deıdi «Áleýmettik medıtsınalyq saqtandyrý qory» KEAQ Aqmola oblystyq fılıalynyń dırektory Nurlan Ahylbekov.
