Oblystyq jáne aýdandyq joldardyń sapasy 75%-ǵa deıin ósti - IIDM
«2020 jyly qurylys, qaıta jańartý jáne jóndeý jumystarymen oblystyq jáne aýdandyq mańyzy bar avtomobıl joldarynyń 4 myń shaqyrymy qamtyldy. Quny 238 mıllıard teńge bolatyn 350 avtojol jobasy júzege asyrylǵan. Atap aıtqanda, 39 shaqyrym jol salyndy. Avtojoldardyń 199 shaqyrymy qaıta jańartylsa, 541 shaqyrymy kúrdeli jóndeýden ótti. Al jergilikti mańyzy bar 3221 shaqyrym jolǵa ortasha jóndeý júrgizildi», delingen habarlamada.
Іske asyrylǵan iri jobalardyń qatarynda Túrkistan qalasyndaǵy halyqaralyq áýejaıǵa baratyn jol bar. Budan bólek, Aqtaý teńiz kýrort aımaǵynda avtomobıl jolyn salý jáne qaıta qurý júrgizilýde. Sondaı-aq, respýblıkalyq mańyzy bar qalalardaǵy kóshelerdi damytý da júzege asyrylǵan.
«Jyl qorytyndysy boıynsha jaqsy jáne qanaǵattanarlyq jaǵdaıdaǵy jergilikti joldardyń úlesi 75%-ǵa jetkizildi. Byltyr bul kórsetkish 71% bolatyn. Atap ótý kerek, oblystyq jáne aýdandyq mańyzy bar avtomobıl joldary jergilikti atqarýshy organdardyń quzyrynda. QR Indýstrııa jáne ınfraqurylymdyq damý mınıstrligi óz kezeginde jyl saıyn jergilikti joldar jelisin damytýǵa maqsatty transfertterdi parıtettik negizde, ıaǵnı 50/50 qylyp bólýde», delingen habarlamada.
Vedomstvonyń málimetinshe, oblystyq jáne aýdandyq mańyzy bar avtomobıl joldarynyń jalpy uzyndyǵy 70,9 myń shaqyrym. 2020-2025 jyldarǵa arnalǵan «Nurly jol» memlekettik baǵdarlamasyna sáıkes oblystyq jáne aýdandyq mańyzy bar 27 myń shaqyrym joldy qurylys jumystarymen qamtý kózdelgen. Sondaı-aq, joldardyń 95%-yn jaqsy jáne qanaǵattanarlyq jaǵdaıǵa keltirý josparlanyp otyr.
Eske sala ketsek, byltyr Qazaqstanda barlyǵy 9,8 myń shaqyrym jol jóndelgen.
