Oblystyq sottardy jańǵyrtý jumysyn qısyndy túrde aıaǵyna jetkizý kerek
ASTANA. QazAqparat - Oblystyq sottardy jańǵyrtý jumysyn qısyndy túrde aıaǵyna jetkizý kerek. Búgin Parlament Senatynda «Konstıtýtsııaǵa 20 jyl: quqyqtyq memleket ınstıtýty jáne zań shyǵarmashylyq protsesi» atty taqyrypta ótken halyqaralyq konferentsııa barysynda senator Bektas Beknazarov osy máseleni kóterdi.
Senatordyń aıtýynsha, sot bıligi júıesindegi tájirıbede baıqalǵanyndaı, oblystyq sot qurylymyn jańǵyrtý qajet. Óıtkeni, sot daýlaryna tartylatyn taraptardan jergilikti sottarǵa qanaǵattanbaýshylyq qana emes, senbeýshilik týraly pikir kóptep aıtyla bastaǵan. Sonymen qatar, senator bir oblystyq sottyń deńgeıindegi ártúrli sot ınstantsııalarynyń ókilettigin bir ǵana sýdıanyń ıelenýine qatysty shaǵymdar kóp ekenin atap ótti.
«Qazirgi tańda ádilsot salasynyń osy problemasyn sheshetin ýaqyt jetti. Budan shyǵar jol da bar. Bul úshin eń aldymen 2012 jyly qolǵa alynǵan oblystyq sottardy jańǵyrtý reformasyn qısyndy túrde aıaǵyna jetkizý kerek. Munda men oblystyq sotty bir birine baǵynbaıtyn eki uıymdyq qurylymǵa bólý týraly aıtyp otyrmyn. Olar: oblystyq apellıatsııalyq sot jáne oblystyq kassatsııalyq sot. Bundaı arajigin ajyratý tájirıbesine alǵysharttar da barshylyq. Óıtkeni, árbir oblystyq sottarda apellıatsııalyq jáne kassatsııalyq ınstantsııalar qyzmeti bar», - dedi depýtat B. Beknazarov.
Onyń aıtýynsha, mundaı eki qurylym etip bólý barysynda alqalardyń árbiri ózderiniń ishki isterin óz betinshe júrgizýge qabiletti. Senatordyń sózine qaraǵanda, bundaı qadam azamattardyń sot júıesine degen senimin joǵarylatady. Óıtkeni, bir birine uıymdastyrýshylyq jáne basqa jaǵynan da baǵynyshty bolmaýy ondaı sottardyń sýdıalaryna óz qatelikteri úshin jeke jaýapkershilikti kóterý múmkindigin de qarastyrmaq.
