Oblystyq sottarda bir appelıatsııalyq sot alqasynyń ornyna eki appellıatsııalyq sot alqasyn qurý usynylady
ASTANA. 18 qańtar. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda «Qazaqstan Respýblıkasynyń sot júıesi men sýdıalardyń mártebesi týraly» QR Konstıtýtsııalyq zańyna ózgerister men tolyqtyrýlar engizý týraly» zańy qabyldandy.
QR Joǵarǵy Sotynyń Tóraǵasy Bektas Beknazarovtyń aıtýynsha, zań búgingi zaman talabyna saı keletin sot bıligin qurýǵa baǵyttalady. Al zań jobalaryn ázirleý barysynda azamattar men zańdy tulǵalardyń ózderiniń quqyqtary men zańdy múddeleriniń sot arqyly qorǵalýyn barynsha tolyq qamtamasyz etý baǵyty ustalǵan. Bul rette atalǵan qujat birqatar usynystardy iske asyrýǵa baǵyttalady. Atap aıtqanda, oblystyq sottarda bir appelıatsııalyq sot alqasynyń ornyna eki appellıatsııalyq sot alqasyn qurý usynylady. Onyń biri azamattyq jáne ákimshilik ister boıynsha alqa, ekinshisi qylmystyq ister boıynsha alqa bolyp tabylady. Budan bólek, oblystyq sottyń tóraǵasyna kassatsııalyq sot alqasyn basqarý jónindegi ókilettikter berý usynylady. Sýdıalardyń tártiptik-biliktilik alqalary, olardyń ókilettikteri Sot qazylaryna berile otyryp, Qazaqstannyń Joǵarǵy Sot Keńesiniń kásibı sýdıalar korpýsyn qalyptastyrý máselelerindegi róli kúsheıtiledi.
«Memleket basshysy ótken jyly Parlamenttiń sessııasyn ashqanda osy máselelerge oralyp, jergilikti sottardyń rólin arttyratyn, Joǵarǵy sottyń qadaǵalaý fýnktsııalaryn ulǵaıtatyn, qadaǵalaý sot protsesin qarapaıymdandyrý men ádil sot tájirıbesindegi negizsiz áýre-sarsańdardy joıýdy kózdeıtin sot júıesin nyǵaıtý jónindegi birqatar zań jobalaryn qarastyrý qajettigine basa nazar aýdarǵan bolatyn. Zańǵa qatysty naq osy talaptar eskerilip, sot qurylysy men sot isin júrgizýdi retteıtin máselelerge erekshe kóńil bólindi», - deıdi Joǵarǵy Sot Tóraǵasy.
