Oblystyq sotta tájirıbeden ótip júrgen sýdıalyqqa úmitkerlerdi Qoǵamdyq keńes baqylaıtyn bolady

Bul týraly búgin QR Parlamenti Senatynyń Konstıtýtsııalyq zańnama, sot júıesi jáne quqyq qorǵaý organdary komıtetiniń jalpy otyrysynda komıtet tóraǵasy Serik Aqylbaı málim etti.

Onyń aıtýynsha, mundaı ózgertý «QR sot júıesi jáne sýdıalar dárejesi týraly» QR Konstıtýtsııalyq zańyna ózgertýler men tolyqtyrýlar engizý týraly» zań jobasy aıasynda engizilip otyr.

«Sýdıalyqqa úmitker azamatty qadaǵalaýǵa bekitilgen sýdıa onyń jumystan tys ýaqyttaǵy tirshiligin tolyq baqylaı almaýy múmkin. Al Qoǵamdyq keńes ony tájirıbeden ótý kezinde ǵana emes, jumys barysynan tys ýaqytta da baqylap otyrady», - dep atap ótti senator.

Onyń aıtýynsha, atalǵan Qoǵamdyq keńes tek oblystyq sottarda ǵana bolady. Joǵarǵy sotta mundaı keńes qurylmaıdy. Sebebi sýdıalyqqa úmitker azamat tájirıbeden tek aýdandyq jáne oblystyq sottarda ótedi. Jáne olar ózderi tájirıbeden ótken óńirlerde odan ári sýdıa bolyp qyzmet etedi.

«Qoǵamdyq keńestiń engizilý sebebi, olar úmitkerdiń ar-namysyn, adamgershilik qasıetterin tolyq baqylaıdy, ishimdikke qumarlyǵy joq pa, paraǵa beıim emes pe degen kemshilikterin de anyqtaıdy. Eger de baqylaý kezinde úmitkerlerdiń osyndaı qylyqtary baıqalyp jatsa, olar sýdıalyqqa ótpeı de qalýy múmkin», - deıdi S. Aqylbaı.