Oblystyq sot mártebesin keńeıtetin zań jobasyn Úkimet biraýyzdan maquldady

Atalǵan qujatty tanystyrǵan QR Joǵarǵy sotynyń sýdıasy Bekzat Beknazarovtyń atap ótýinshe, «Qazaqstan Respýblıkasynyń sot júıesi men sýdıalarynyń mártebesi týraly» QR-nyń Konstıtýtsııalyq zańyna ózgerister men tolyqtyrýlar engizý týraly» QR Konstıtýtsııalyq zańynyń jobasy Úkimettiń 2011 jylǵa arnalǵan zań jobalaý josparynyń 25 tarmaǵyna sáıkes ázirlenip, sot júıesin odan ári jetildirýge, jergilikti sottardyń rólin kóterýge, sýdıalardyń táýelsizdigin kúsheıtýge baǵyttalǵan.

Qazirgi tańda sot júıesine qatysty halyqtyń arasynda ártúrli oı-pikir qalyptasqanyn atap ótken ol: «Sot júıesi qazir ózgertýdi qajet etedi. 2011 jyldyń 1 qańtarynan bastap úsh býyndy sot júıesi engizilgen. Bul jaǵynan kelgende Qazaqstandaǵy sot júıesinde álemdegi aldyńǵy memleketterdiń qataryna sáıkes keletin, kópshiliktiń kókeıinen shyǵatyn júıe qurylǵan. Degenmen, osy júıeniń keıbir tustary áli de bolsa pysyqtalyp, qazirgi ýaqyt talabyna saı sáıkestendirýdi qajet etip otyr», - dedi.

Bul zańdy qabyldaýdyń negizgi maqsaty nede? Mine osy saýalǵa jan-jaqty jaýap berýge tyrysqan Joǵary sot tóraǵasynyń paıymynsha, sot sheshimi tez ári jyldam iske asýy tıis. Sotqa kelip júgingen árbir azamat, zańdy ne bolmasa jeke tulǵa óz máselesin tez arada sheship, sot oryndaý qaǵazyn alǵannan keıin oryndaý protsesine barýy kerek. Al qazirgi ýaqytta Joǵarǵy sot quziretiniń shekten tys keńeıýine baılanysty osy máseleniń arasy alshaqtap ketkenin ýaqyttyń ózi kórsetip otyr. Qazir zańdy kúshine engen sot sheshimderi aktileriniń zańdylyǵyn tekserý tek qana Joǵarǵy sottyń quziretine berilgen. «Bizde jylyna mıllıonǵa jýyq sot isteri qaralady. Al endi Joǵarǵy sot osy ister boıynsha, olardyń zańdy úkiminiń kúshine engen sot sheshimderiniń zańdylyǵyn tekserýge barlyq kezde úlgerip otyr ma, oǵan daıar ma degen máselege kelgende ýaqyttyń ózi bul máselede jergilikti oblystyq sottardyń áleýetin keńeıtý máselesin qarastyryp otyr», - dedi B.Beknazarov.

Osy oraıda Joǵarǵy sot usynyp otyrǵan zań jobasynda kez kelgen is eń birinshi satyda aýdandyq jáne oǵan teńestirilgen sottarda qaralýy kerek. Zańda belgilengen merzim boıynsha sot sheshimine narazy bolǵan tulǵa nemese tarap apellıatsııalyq shaǵymyn berýi qajet. Apellıatsııalyq shaǵym qaralǵannan keıin sot aktisi birden kúshine enýi tıis. Oryndaý qaǵazy jazylyp, sot aktisi oryndalýǵa jiberilýi qajet. Al eger apellıatsııadan keıin kúshine engen sot aktisimen kelispeıtin taraptar bolatyn bolsa, onda kassatsııalyq sot alqasyna, oblystyq sotqa shaǵymdanýy qajet. «Bul myńdaǵan azamattardyń, myńdaǵan isterdiń ár oblys ortalyqtarynan bizge, Joǵarǵy sotqa kelýiniń qajettiligi joq ekendigin kórsetedi. Oblystyq sottar qazir kásiptik deńgeıi joǵary, barlyq jaǵdaıda ister boıynsha durys sheshim qabyldaıtyn sýdıalarmen qalyptastyrylǵan. Sondyqtan kassatsııalyq sot alqasy 6 aılyq merzimniń ishinde zańdy kúshine engen sot aktilerin qarap, onyń zańylyǵyn tekserip óz qaýlysyn qabyldaıdy», - dedi ol.

Óz kezeginde Mınıstrler Kabıneti tarapynan biraýyzdan qabyldanǵan zań jobasyna qatysty pikirin bildirgen Úkimet basshysy K.Másimov: «Biz bul máselelerdi jınalystarda birneshe márte talqyladyq. Quqyq qorǵaý organdary ókilderi tarapynan, Úkimet ishinde de kóptegen daý-damaı boldy. Menińshe, bul jaqsy tózimdi qujat. Bul sot júıesi arqyly zań ádildiginiń aıtarlyqtaı sapaly bolýyna jáne bizdiń azamattarymyzdyń, zańdy tulǵalarymyzdyń quqyqtaryn óte jaqsy qorǵaýǵa múmkindik beretinine úmit artamyz», - dedi.