Oblystyq bılikke eldi mekenniń mártebesin ózgertý quziretin berý kerek - depýtat
NUR-SULTAN. QazAqparat - QR Parlamentiniń depýtattary oblystyq bılikke eldi mekenniń mártebesin ózgertý quziretin berýdi usynyp otyr. Bul jaıynda búgin Zańshyǵarmashylyq qyzmet máseleleri jónindegi vedomstvoaralyq komıssııasy otyrysynda Májilis depýtaty Taras Hıtýov aıtty, dep habarlaıdy QazAqparat tilshisi.
«Eldiń ákimshilik-aýmaqtyq bólinisiniń qoldanystaǵy sanaty jekelege eldi mekenderdiń qazirgi mártebesin tolyq kólemde kórsete almaıdy. Qazirgi ýaqytta zańnamada aýdandyq mańyzy bar qalanyń mártebesin aýyldyq eldi mekenge aýystyrý normasy joq. Búginde halyq sany boıynsha qala mártebesine saı kelmeıtin aýdandyq mańyzdaǵy 14 qala bar. «Qazaqstan Respýblıkasynyń ákimshilik-aýmaqtyq bólinisi týraly» qoldanystaǵy zańmen keminde 10 myń turǵyny bar eldi mekender aýdandyq mańyzy bar qala sanalatyndyǵy aıqyndalǵan. Atalǵan aýdandyq mańyzy bar qalalardaǵy halyq sanynyń qysqarýyna baılanysty olardyń mártebesin ózgertý qajettigi týyndaıdy. Sondyqtan aýdandyq mańyzy bar qalalardyń mártebesin ózgertýdi aıqyndaýdyń naqty tetigi qajet», - dedi komıssııa otyrysynda «Óńirlerdiń ákimshilik-aýmaqtyq qurylymyn jetildirý máseleleri boıynsha QR keıbir zańnamalyq aktilerine ózgertýlermen tolyqtyrýlar engizý týraly» zań jobasyn tanystyrǵan T.Hıtýov
Onyń aıtýynsha, joǵaryda atalǵan qoldanystaǵy zańǵa sáıkes óńir birneshe eldi mekendi qamtıtyn respýblıka aýmaǵynyń bóligi sanalady. Sonymen qatar dál osy zańda aýyldyq okrýg te óńir dep kórsetilgen. Osyǵan oraı bastama bolyp otyrǵan zań jobasy «Qazaqstan Respýblıkasynyń ákimshilik-aýmaqtyq bólinisi týraly» qoldanystaǵy zańǵa birqatar túzetý engizýdi kózdeıdi. Onyń ishinde oblystyq ókildik jáne atqarýshy organdarǵa eldi mekendi aýyl sanatyna jatqyzý quziretin berý bar.
