Oblystardyń bilim berý sapasy ortasha kórsetkishten tómen - Erlan Saǵadıev
ASTANA. QazAqparat - QR Bilim jáne ǵylym mınıstri Erlan Saǵadıev oblystarda bilim berýdiń sapasyn baǵalaý nátıjesin jarııalady, dep xabarlaıdy QazAqparat tilshisi.
Mınıstrdiń aıtýynsha, búginde mektep oqýshylarynyń bilimin baǵalaý nátıjesinde respýblıka boıynsha ortasha kórsetkish 39,4 upaıdy qurady. Alaıda keıbir oblystardyń upaılary respýblıkalyq kórsetkishten de tómen.
«Máselen, Aqtóbe oblysy - 29,4 upaı, Soltústik Qazaqstan oblysy - 30 upaı, Ońtústik Qazaqstan oblysy - 31 upaı. Osy oblystardyń bilim berý sapasyn arttyrýǵa nazar aýdarýdy suraımyz», - dedi E.Saǵadıev Úkimettiń búgingi otyrysynda.
Osy oraıda Úkimet basshysy Baqytjan Saǵyntaev aldymen Jambyl oblysynan esep berýdi surady. Sebebi ol jaqta 16 ındıkator boıynsha tıisti kórsetkishter oryndalmady. Oblys ákimi Asqar Myrzaxmetov mınıstrliktiń esebimen kelispeıtinin jetkizdi.
«Bizdegi málimet boıynsha baǵdarlamanyń barlyq kórsetkishteri oryndalyp otyr. Tek qana ulttyq biryńǵaı test boıynsha...», - dedi A.Myrzaxmetov.
Osy kezde Premer-Mınıstr Jambyl oblysy boıynsha mınıstrliktiń esebin tolyǵymen oqyp berýdi usyndy.
«Sizge bárin oqyp bereıin be? Joq, álde ózińiz Bilim jáne ǵylym mınıstrligimen xabarlasyp anyqtaısyz ba?», - dep surady B.Saǵyntaev.
Oblys basshysy atalǵan usynyspen kelisti.
«Bizdegi málimet basqa... Negizi, bizde tórt ındıkator boıynsha 25 kórsetkish tolyǵymen oryndalǵan. Atap aıtsaq, ótken jyly 4623 orny bar 33 balabaqsha jáne 4 shaǵyn ortalyq ashyldy. Sonyń ishinde 30-y jekemenshik balabaqsha, sóıtip oblysta mektepke deıingi bilimmen qamtý deńgeıi 1-6 jas aralyǵynda 68 protsentti, al 1-3 jas aralyǵynda 92 protsentti qurap otyr. Bilim berýdiń jańartylǵan mazmuny boıynsha 10 321 muǵalim oqytyldy. Bul - barlyq muǵalimderdiń 42 protsenti. Bıyl taǵy 5 295 pedagog oqytylady. Osylaısha, jalpy kórsetkish 62,3 protsent bolmaq. Jańartylǵan baǵdarlamamen sabaq beretin muǵalimderdiń jalaqysyna qosymsha 30 protsent aqy aǵymdaǵy jyly naýryz aıynda tolyǵymen tólendi. Baqytjan Ábdiruly, mınıstrlik usynǵan málimet eskirip qalǵan bolýy kerek. Ruqsat bolsa, biz mınıstrlikpen taǵy anyqtaıyq», - dep atap kórsetti A.Myrzaxmetov.
Premer-Mınıstr Baqytjan Saǵyntaev bolsa, málimet jaǵynan eshqandaı aıyrmashylyq joq ekenin jetkizdi.
«Kórdińiz be, tekseremiz dep edik, qaramaǵyńyzdaǵylar eskirip qalǵan málimet dep shyǵa keldi. Málámetterdiń bári Sizder bergen tsıfrlar boıynsha jasaldy. Biz óz tarapymyzdan eshteńe qosyp otyrǵan joqpyz. Qaramaǵyńyzdaǵy ózińizdiń kómekshilerińizge qatań talap qoıyp surańyz», - dedi B.Saǵyntaev.
Otyrys barysynda Aqtóbe oblysynyń ákimi Berdibek Saparbaev ta óz esebin usyndy. Ol jaqta 13 kórsetkish oryndalmaı otyr. Onyń aıtýynsha, 32 kórsetkishtiń ekeýi ǵana oryndalmaǵan.
«Bilim mınıstrligimen sáıkespeýshilikter bar. Biz keshe olarmen jumys jasadyq. Olarǵa bárin túsindirip dáleldedik. Mınıstrlik 9 aıdyń kórsetkishterin alyp otyr. Al 12 aıdy alatyn bolsaq, onda ekeýinen basqasy tolyǵymen oryndalǵan», - dep atap kórsetti B.Saparbaev.
Ákimniń sózine qaraǵanda, bilim berý sapasy jaǵynan kemshilikter bar. Sol úshin bilim basqarmasynyń basshysy qyzmetinen bosatylǵan bolatyn. Batys Qazaqstan oblysy da mınıstrlik esebimen sáıkespeýshiliktiń bar ekenin alǵa tartty. Sebebi atalǵan esep ótken jyldyń 9 aıdyń qorytyndysy boıynsha jasaldy.
