Oblystardan aýdandarǵa 14 memlekettik fýnktsııany berý josparlandy

ASTANA. QazAqparat - Ákimshilik reforma aıasynda respýblıka oblystarynan 14 memlekettik fýnktsııa aýdandarǵa ótetin bolady. Bul týraly búgin Májiliste «Qazaqstan Respýblıkasynyń Úkimeti týraly» Konstıtýtsııalyq zańyna ózgerister engizý týraly» zań jobasynyń tanystyrylymy barysynda Ulttyq ekonomıka mınıstri Erbolat Dosaev málim etti.

«Jergilikti bılik deńgeıleri arasynda oblystyqtan aýdandyq deńgeıge 14 fýnktsııany ótkizý kózdelip otyr. Olardyń arasynda oblys aýmaǵynda sporttyq ǵımarattar qurylysy máselelerin úılestirý, shalǵaıdaǵy eldi mekenderde turatyn balalardy jalpy bilim beretin orta mektepterge tasymaldaý tártibi sekildi máseleler bar», - deıdi mınıstr E.Dosaev.

Onyń sózine qaraǵanda, zań jobasy boıynsha sáýlet-qurylys jumystaryn qadaǵalaý salasynda jergilikti atqarýshy organdarǵa lıtsenzııalaý, attestatsııalaý jáne baqylaý, qala qurylysy jáne qurylys, nysandar qurylysynyń sapasyna memlekettik sáýlet-qurylysy boıynsha qadaǵalaý, tapsyrys berýshilerdiń tehnıkalyq qadaǵalaý qyzmetin baqylaý, avtorlyq qadaǵalaý, jobalardy ázirleý fýnktsııalary berilmek.

Jer resýrstaryn basqarý salasynda da jergilikti atqarýshy organdarǵa birqatar fýnktsııalar júktelmek. Atap aıtqanda, olardyń arasynda jer zańnamasyn buzýshylyqtardy joıý jónindegi oryndaý mindetti bolyp tabylatyn uıǵarymdardy berý, jer zańnamasy salasynda ákimshilik quqyqbuzýshylyq týraly isterdi qaraý sekildi ókilettikter bar.

Eske sala keteıik, zań jobasymen Úkimettiń búgingi qoldanystaǵy 2 342 fýnktsııasynyń 1598-in mınıstrlikterge berý kózdelip otyr. Onyń ishinde áleýmettik salanyń - 98, aýyl sharýashylyǵynyń - 227, kólik, baılanys jáne kommýnıkatsııa salasynyń - 225, energetıka salasynyń 83 fýnktsııasy bar.