Oblystar men qalalardaǵy jumyldyrý daıyndyǵy jáne tótenshe jaǵdaılar basqarmalary taratylýy múmkin
ASTANA. 20 sáýir. QazAqparat - Oblystardyń, respýblıkalyq mańyzy bar qalanyń, astananyń jergilikti atqarýshy organdarynyń jumyldyrý daıyndyǵy jáne tótenshe jaǵdaılar basqarmalaryn taratý josparlanady.
Bul týraly «Qazaqstan Respýblıkasynyń keıbir zańnamalyq aktilerine memlekettik basqarý organdary arasyndaǵy ókilettikterdiń arajigin ajyratý máseleleri boıynsha ózgerister men tolyqtyrýlar engizý týraly» zań jobasynda qamtylyp otyr. Eske salsaq, atalǵan qujat Parlament Májilisinde keshe tanystyrylǵan bolatyn.
Aıta keteıik, Memleket basshysy 2013 jyly ortalyq jáne óńirler arasyndaǵy jaýapkershiliktiń jáne ókilettikterdiń arajigin ajyratý boıynsha naqty sharalar qabyldaýdy, jergilikti atqarýshy organdardy kúsheıtýdi tapsyrǵan bolatyn. Al zań jobasyn qabyldaýdyń ózektiligi memlekettik basqarý deńgeıleri arasyndaǵy ókilettikterdiń arajigin odan ári ajyratý jáne jergilikti atqarýshy organdardy nyǵaıtý qajettiligine negizdelgen. Budan bólek, qujat qosarlanýshylyqty boldyrmaýǵa, sondaı-aq jekelegen ókilettikterdi ortalyqtan óńirlerge, ıaǵnı halyqqa jáne bızneske jaqyndatýǵa múmkindik beredi. Tıisinshe, ortalyqtan óńirlerge tıisti shtat sanyn qaıta bólý, jergilikti deńgeıge qosymsha ókilettikter berýdi qamtamasyz etý, memlekettik basqarýdyń jergilikti deńgeıin qajetti bıýdjettik qarajattarmen jáne shtat sanymen nyǵaıtý josparlanady, sondaı-aq jergilikti memlekettik basqarýdyń úlgilik qurylymy qaıta qaralatyn bolady.
«Zań jobasy sheńberinde ortalyq memlekettik organdardyń jekelegen aýmaqtyq bólimsheleriniń, ákimdikteriniń qyzmetin qaıtalaıtyn fýnktsııalardy alyp tastaý, sondaı-aq ortalyq memlekettik organdardyń birqatar quzyretterin memlekettik basqarýdyń jergilikti deńgeılerine berý qarastyrylǵan. Mysaly, oblystardyń, respýblıkalyq mańyzy bar qalanyń, astananyń jergilikti atqarýshy organdarynyń jumyldyrý daıyndyǵy jáne tótenshe jaǵdaılar basqarmalaryn taratý josparlanady. Olardyń azamattyq qorǵanys, apattar men dúleı apattardyń aldyn alýdy jáne joıý fýnktsııalaryn oryndaýdy oblystardaǵy, respýblıkalyq mańyzy bar qaladaǵy, astanadaǵy Tótenshe jaǵdaılar mınıstrliginiń Tótenshe jaǵdaılar departamentterine júkteý usynylady. Bul shara Tótenshe jaǵdaılar mınıstrligi men oblystardyń, Astana jáne Almaty qalalardyń jergilikti atqarýshy organdarynyń arasyndaǵy qoldanystaǵy parallelızmdi joıýǵa múmkindik beredi», - delingen zań jobasynyń túsindirme jazbasynda.
