Oblystar men aýdandardyń aýmaqtaryn damytý úshin baǵdarlamalarǵa ózgerister engizý kerek - QR Óńirlik damý mınıstrligi
ASTANA. 4 qyrkúıek. QazAqparat - Aýyldyq jáne kenttik okrýgterdiń ortalyqtaryn damytýdy oblys aýmaqtaryn damytý baǵdarlamalarynyń, al áleýeti joǵary jáne orta aýyldardy aýdandardyń aýmaqtaryn damytý baǵdarlamalarynyń aıasynda júzege asyrý usynylady. Bul týraly búgin Úkimet otyrysynda QR Óńirlik damý vıtse-mınıstri Serik Jumanǵarın aıtty.
«Ol úshin tıisti oblystyq jáne aýdandyq Іs-sharalar josparyn ázirlep, olardy jumys isteıtin kásiporyndardy qoldaý men keńeıtý, orta jáne iri aýyl sharýashylyǵy kásiporyndaryn qurý, shaǵyn jáne orta bıznesti, sondaı-aq aýyldyq ınfraqurylymdardy damytý boıynsha sharalar kózdeletin bolady», - dedi vıtse-mınıstr. Onyń sózine qaraǵanda, tirekti eldi mekenderdi damytýdyń Keshendi josparlaryn jáne aýyldyq, kenttik okrýgterdiń ortalyqtaryn damytý boıynsha oblystyq josparlardy óńirlik damý salasyndaǵy ýákiletti organmen keliskennen keıin oblystyq máslıhattar bekitedi. Al damý áleýeti joǵary jáne orta aýyldyq jerlerdi damytý jónindegi aýdandyq josparlardy aýdandyq máslıhattar maquldaıdy. «Bul turǵyda oblystar men aýdandardyń aýmaqtaryn damytý úshin baǵdarlamalaryna ózgerister engizý kerek. Eldi mekenderdi damytý boıynsha Keshendi josparlardy, oblystyq jáne aýdandyq josparlardy qarjylandyrý kezinde qoldanystaǵy memlekettik pen salalyq baǵdarlamalardy, sondaı-aq oblystar men aýdandardyń aýmaqtaryn damytý baǵdarlamalaryn qarjylandyrý tetikterin paıdalaný usynylady», - deıdi S. Jumanǵarın. Mınıstrliktiń habarlaýynsha, aýyldyq aýmaqtardy damytý boıynsha barlyq bıýdjettik ınvestıtsııalyq jobalar óńirlik damý salasyndaǵy ortalyq ýákiletti organmen tıisti josparǵa sáıkestigi jóninde kelisilýi qajet.
