Oblystar men aýdan ákimdikteri janynda terrorızmge qarsy komıssııalar qurylatyn bolady

Bul týraly búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn talqylaý barysynda depýtat Máýlen Áshimbaev málim etti.

Depýtattyń aıtýynsha, búgingi kúni terrorızm kóptegen elder úshin ózekti problemaǵa aınalyp barady.

«Álemdik tájirıbege súıensek, búgingi tańda terrorızm jáne ekstremızmmen kúres negizinde eki basty prıntsp jatyr.  Onyń birinshisi terrorızmmmen kúreske keshendi qadam jasaý. Al ekinshi basty qaǵıdat osynaý áleýmettik qubylyspen kúreste aldyn alatyn, eskertetin, profılaktıkalyq sharalar. Dál osy eki qaǵıdat talqylanyp otyrǵan zań jobasynyń negizgi ózegi bolyp tabylady», - deıdi Máýlen Áshimbaev.  

Bul rette depýtat  barlyq memlekettik organdardyń terrorızmmmen kúreske jumylatynyn atap ótti. «Eger bul mindet buǵan deıin tek qana quqyq qoroǵaý organdary júıesiniń quzyrynda bolatyn bolsa, jańa zań jobasymen birqatar memlekettik organdardyń jaýapkershiligi keńeıe túsedi. Budan bólek, qazirgi tańda ásirese jergilikti óńirlerde aýqymdy sharalardy júzege asyrý qajettigi aıqyn sezilip otyrǵany belgili. Soǵan qaraı, zań jobasymen oblys, aýdan ákimdikteri janynda arnaıy terrorızmge qarsy komıssııalar qurylatyn bolady», - deıdi depýtat.