Oblystar arasyndaǵy kólik qatynasyna qatysty shekteýler qalatyn boldy
NUR-SULTAN. QazAqparat – Oblystar arasyndaǵy kólik qatynasyna qatysty shekteýler qala beredi. Bul týraly Memleket basshysy Qasym-Jomart Toqaev Tótenshe jaǵdaı rejımin qamtamasyz etý jónindegi memlekettik komıssııanyń otyrysynda málim etti, dep habarlaıdy QazAqparat.
«Úkimet jańa sanıtarlyq erejelerdi daıyndap, engizýi qajet. Shaǵyn, orta, iri kompanııalar jańa erejelerge sáıkes jumys isteýi kerek. Áleýmettik ara qashyqtyqty saqtaý, kópshilik jınalǵan jerde betperde taǵyp júrý qalypty jaǵdaıǵa aınalýǵa tıis. Oblystar arasyndaǵy kólik qatynasyna qatysty shekteýler qala beredi», - dedi Memleket basshysy.
Búginde kóptegen salanyń qyzmeti qalpyna kele bastaǵanyna toqtalǵan Prezıdent: «Qazirdiń ózinde 1 mıllıon 100 myńnan astam azamat jumysqa shyqty. Búginnen bastap elimiz boıynsha dúkenderdiń birazy ashylady, sán salondarynyń, bilim ortalyqtarynyń, taǵy basqa nysandardyń qyzmeti qaıta jandanady. Saıabaqtar ashylady. Jolaýshylarǵa arnalǵan áýe tasymalynyń jumysy qalpyna keledi. Buǵan deıin 6 qalanyń áýejaıy ashylǵan bolatyn. Endi oǵan taǵy 7 qala qosylady. Kóptegen shekteýler alynyp tastaldy», - dedi.
