Oblys, aýdan ákimi: Ulytaý óńirinen Senat depýtattyǵyna kimder úmitker

ULYTAÝ. QazAqparat - QR Parlamenti Senatynyń depýtattyǵyna Ulytaý oblysynan óz kandıdatýrasyn 11 adam usyndy. Olardyń arasynda oblys ákiminiń orynbasary, aýdan ákimi, oblystyq máslıhat hatshysy jáne depýtattary bar, dep habarlaıdy QazAqparat tilshisi.

Prezıdent Qasym-Jomart Toqaev Abaı, Jetisý jáne Ulytaý oblystarynan Senat depýtattaryn saılaý týraly Jarlyqqa qol qoıǵany belgili. Senatqa saılaý 2022 jylǵy 24 tamyzǵa belgilendi.

Daýys berýdi ótkizý, saılaý qorytyndysyn belgileý jáne Senat depýtattarynyń ókilettik merzimin aıqyndaý «Qazaqstan Respýblıkasyndaǵy saılaý týraly» QR Konstıtýtsııalyq zańynyń 129-babyna sáıkes júzege asyrylady.

Buǵan deıin Memleket basshysy jańa úsh oblystyń ákimderine jáne Úkimetke Senatqa depýtattar saılaýdy uıymdastyrý jóninde birqatar shara qabyldaýdy, sondaı-aq materıaldyq-tehnıkalyq jáne qarjylyq qamtamasyz etýdi sheshýdi tapsyrǵan bolatyn.

Búgingi tańda Ulytaý oblysynan Senat depýtattyǵyna 11 adam óz kandıdatýrasyn usyndy.

Olardyń qatarynda:

1) Medebaev Sovetbek Tursynuly, 1965 jyly týǵan, Ulytaý aýdanynyń ákimi, Ulytaý oblysynyń Ulytaý aýdanynda turady;

2) Jaqsybekov Danııar Daýkenuly, 1988 jyly týǵan, Ulytaý oblysy, Qarajal qalasynyń Jáırem kentinde turatyn «Jáırem KBK» AQ ǵımarattar, qonaqúıler, jataqhanalar kesheniniń aǵa ákimshisi;

3) Janǵaskınova Sholpan Serikqyzy, 1981 jyly týǵan, «Damý» stýdııasynyń dırektory, Ulytaý oblysy Sátbaev qalasynda turady;

4) Oralbaı Nasenuly Moldabaev, 1966 jyly týǵan, Jańaarqa aýdanynyń VP-21 bastyǵy, Ulytaý oblysynyń Jańaarqa aýdanynda turady;

5) Myrzabekov Amanjol Batyrbekuly, 1973 jyly týǵan, Ulytaý aýdany máslıhatynyń hatshysy, Ulytaý oblysynyń Ulytaý aýdanynda turady;

6) Nurpeıisov Ǵalymjan Bodyquly, 1977 jyly týǵan, «Aqsham» telearnasynyń dırektory;

7) Ospanova Zamzagúl Qajmuqanovna, 1964 jyly týǵan, Qarajal qalalyq máslıhatynyń hatshysy, Ulytaý oblysynyń Qarajal qalasynda turady;

8) Halılın Erden Baltabaıuly,1967 jyly týǵan, Á. Moldaǵulova atyndaǵy daryndy balalarǵa arnalǵan Qaraǵandy oblystyq mamandandyrylǵan sporttyq mektep-ınternatynyń basshysy, Ulytaý oblysynyń Qarajal qalasynda turady;

9) Shaıdarov Serik Jamanqululy, 1965 jyly týǵan, Qaraǵandy oblysy ákiminiń orynbasary, Ulytaý oblysynyń Jezqazǵan qalasynda turady;

10) Qojahmetov Baqtııar Saparbekuly, 1962 jyly týǵan, «Uly Taǵzym» qoǵamdyq qorynyń atqarýshy dırektory, Ulytaý oblysynyń Jezqazǵan qalasynda turady;

11) Qaısarov Ýálıhan Ábishuly, 1965 jyly týǵan, «Global Services System» JShS dırektory, Ulytaý oblysynyń Jezqazǵan qalasynda turady.