Oblys ákimi Túrkistandaǵy tarıhı oryndardy qalpyna keltirý barysyn tekserdi
TÚRKІSTAN. QazAqparat – Túrkistan oblysynyń ákimi Ómirzaq Shókeev Túrkistannyń tarıhı-mádenı ortalyǵyn qaıta jańǵyrtýǵa baılanysty jumystardyń barysyn baqylap qaıtty. Aımaq basshysy «Áziret Sultan» qoryq-mýzeıiniń damý jospary boıynsha atqarylyp jatqan jumystardy pysyqtap, jaýaptylarǵa tıisti nusqaýlar berdi, dep habarlaıdy QazAqparat tilshisi.
Óńir basshysy «Áziret Sultan» memlekettik tarıhı-mádenı qoryq-mýzeıine qarasty «Han meshiti», «Han ordasy» jáne Kúltóbe qalashyǵyn aralap kórdi. «Jeti ata» men «Darbaza», «Músálla», «Tákııa» qaqpalaryndaǵy jumystarmen tanysty. Aýmaǵy 100 gektarǵa jetetin abattandyrý alańy men Tuńǵysh Prezıdent baǵynyń qurylysyn baqylady. Jańa jobaǵa sáıkes, Qoja Ahmet ıAsaýı kesenesine zııarat etýshiler jańadan salynyp jatqan baý-baqshaly jasyl aýmaqpen júrip ótedi. Munda túrli jemis-jıdek aǵashtary ósetin botantıkalyq baý boı kóteredi. Ómirzaq Estaıuly jobanyń jumys josparymen tanysyp, bul aýmaqqa aldaǵy kezde turaqty kıiz úı turǵyzýdy tapsyrdy. Sondaı-aq, kesene mańynda kóshpendiler salty men dástúrinen erekshe syr tartatyn, ortaǵasyrlyq turmystan aıryqsha kórinis beretin Etnoaýyl salynbaq.
Aıta keteıik, keseneniń 88,7 ga quraıtyn býferli qorǵaý aımaǵynda Rýhanı týrızm ortalyǵy qurylady. Ol jerden osy aýmaqta ornalasqan barlyq qasterli oryndardy tamashalaýǵa bolady. Halyqaralyq tájirıbeniń eń ozyq úlgilerin nazarǵa ala otyryp, «Áziret Sultan» kesheniniń múmkindikteri keńeıtilýde. Osylaısha Uly jibek joly dáýiri tusyndaǵy kelbeti qalpyna keltirilmek. Keseneden 700 metr qashyqtyqta turǵan Túrkistan eldi mekeniniń eń ejelgi qalashyǵy - Kúltóbe ashyq aspan astyndaǵy mýzeıge aınalady dep josparlanyp otyr. Mavzoleıdiń memorıaldy jáne saıabaq aımaǵynda Abylaı han, Jolbarys han, Qasym han, Jánibek batyr, Qazybek bıdiń jáne t.b. jerlengen oryndar qorshalyp, bıiktetilgen. Kesene men Jeti Ata qaqpasy arasyndaǵy tarıhı kóldiń oıystary qaıta qalpyna keltirilip, tarıhı meshitke aparatyn jol, qudyq jáne ıAsaýıdiń sońǵy 20 jyl ómirin ótkizgen Qylýetke aparatyn ortaǵasyrlyq rabattar men ortalyq kósheler qaıta jańǵyrtylyp jatyr. Oblys basshysy sondaı-aq, qasıetti keseneniń aımaǵynda oryn alǵan Qashqarı gúlzaryn aralap shyqty. Nıý-Iork baspaldaǵynyń qurylysymen tanysty. Ashyq aspan astynda ótetin dýmandy merekelerge arnalǵan jańa oryn Esimhan alańynda salynýda. Onda «Open Space» úlgisindegi is-sharalar, san alýan saıystar men festıvalder ótkizilmek. Turǵyndar mundaǵy úlken ekrandar arqyly fılmder men fýtbol oıyndaryn tamashalaıtyn bolady.
