Oblys ákimi Temirtaýdaǵy aýyz sý problemasyn taıaý kúnderi sheshýge ýáde etti
ASTANA. QazAqparat - Temirtaý turǵyndaryna aýyz sý jetkizý birneshe kúnde sheshiledi.
Bul jaıynda búgin Úkimettiń selektorlyq rejimdegi otyrysynda Qaraǵandy oblysynyń ákimi Erlan Qoshanov málim etti, dep habarlaıdy QazAqparat.
«Oblys sý tasqyny kezeńiniń shyrqaý sheginde tur. Júrgizilgen saraptama tasqyn sý kóleminiń 2015 jylǵy deńgeımen birdeı ekendigin kórsetti. Sý tasqyny oblystyń 7 aýdanynda oryn alýda. Onyń ishinde 3 aýdandaǵy ahýal barynsha kúrdeli. Sý tasqyny saldarynan 132 jeke turǵyn úıdi sý basty. Der ýaqytta halyqty qaýipsiz jerge kóshirý qolǵa alyndy, shamamen 800 adam qaýipsiz jerge shyǵaryldy. Halyq múlkiniń tonalýyna jol bermeý úshin kúzet uıymdastyrylyp, barlyǵy da ystyq tamaqpen jáne kıimmen qamtamasyz etildi», - dedi Erlan Qoshanov.
Onyń aıtýynsha, sý tasqynyna qarsy jumystarǵa shamamen 2500 adam men 700-den astam tehnıka jumyldyrylǵan. Barlyq óńirde arnaıy qurylǵan shtabtar kúni-túni jumys istep tur.
«Qazgıdromet málimetterine sáıkes, taıaý eki-úsh kúnde sý tasqyny ahýalynyń turaqtalatyndyǵy kútilýde. Jalpy jaǵdaı baqylaýda», - dedi oblys ákimi.
Osy rette Premer-Mınıstr Baqytjan Saǵyntaev aımaq basshysynan Temirtaýda oryn alǵan jaıtqa baılanysty esep berýdi ótindi. «Temirtaýda aýyz sý problemasy sheshildi me? Ne boldy? Mundaı apat nelikten oryn aldy?», - dedi Úkimet basshysy.
Óz kezeginde Erlan Qoshanov problema birneshe kúnniń ishinde sheshiletindigin aıtyp sendirdi. «Transformatorlyq stansany sý basyp, sonyń saldarynan sorǵysh isten shyqty», - dedi ol.
B.Saǵyntaevtyń dereginshe, oryn alǵan apat saldarynan Temirtaýda kópqabatty 200 jáne jekemenshik 3 myń turǵyn úıi sýsyz qalǵan.
