Oblys ákimi Pavlodarda azyq-túlik baǵasyn turaqtandyrýdy tapsyrdy
PAVLODAR. QazAqparat - Estaı atyndaǵy mádenıet saraıynda Pavlodar ákimi Qaırat Núkenovtiń turǵyndar aldyndaǵy eseptik kezdesýi ótti, dep habarlaıdy QazAqparat pavlodarnews.kz saıtyna silteme jasap.
Qala basshysy 2019 jyly oblys ortalyǵynda atqarylǵan jumys nátıjelerin usyndy. Máselen, qalanyń ónerkásiptik kásiporyndarynyń byltyrǵy jalpy ónimi 802 mlrd teńgeni qurady. Bul, 2018 jylǵy kórsetkishten 2% artyq. Agrarlyq sektorda 2019 jyly 1 mlrd teńgeden astam 5 ınvestıtsııalyq joba iske asty. Nátıjesinde 100-den astam jańa jumys orny ashyldy. Jyl qorytyndysy boıynsha aýyl sharýashylyǵynyń jalpy ónim kólemi 12 mlrd teńgeni nemese 2018 jylǵa qaraǵanda 116% qurady.
Eseptik kezdesýge qatysqan oblys ákimi Ábilqaıyr Sqaqov Pavlodar men Nur-Sultan qalalarynyń arasyndaǵy azyq-túlik beldeýiniń ornatylmaǵanyn synǵa aldy.
«Naryǵymyzdy óz taýarlarymyzben qamtamasyz etýge múmkindigimiz bar. Keshe Ekibastuzda boldym. Sonda ósiriletin qyzanaq pen raýshan gúlderiniń 80% eksportqa shyǵady. Osy oraıda, birinshi kezekte óz tutynýshylarymyzdy sapaly ári arzan aýyl sharýashylyǵy ónimderimen qamtamasyz etýimiz qajet», - dedi Ábilqaıyr Sqaqov.
Onyń ústine, óńir basshysy Pavloda ákimine áleýmettik mańyzy bar azyq-túlik baǵalaryn turaqtandyrý maqsatynda túbegeıli is-sharalardy qolǵa alýdy mindettedi. 2019 jyly áleýmettik mańyzy bar 19 taýardyń 14-ine baǵa ósken. Osy oraıda Ábilqaıyr Sqaqov deldaldardy shettetip, aýyl sharýashylyǵy ónimderin óndirýshilermen tikeleı kelisimshart jasasý kerektigine nazar aýdardy.
