Oblys ákimderiniń orynbasarlary «aqyldy» qala tehnologııalarymen tanysty

KÓKShETAÝ. QazAqparat - Qazaqstannyń barlyq oblystary ákimderiniń orynbasalary elimizdegi tuńǵysh «aqyldy» qala - Aqkóldegi jańa tehnologııalarmen tanysty, dep habarlaıdy QazAqparat tilshisi aımaq basshysynyń orynbasary Marat Iǵalıevke silteme jasap.

«Qazaqtelekom» AQ, Aqmola oblysynyń ákimdigi, «Smart Aqmola» óńirdi tsıfrlandyrý keńsesi jáne «Tengri Lab» kompanııasy birlesip, qonaqtarǵa elimizdegi tuńǵysh «aqyldy qala» - «Smart Aqkol» jobasy sheńberinde júzege asyrylǵan ıgi jańalyqtardy tanystyrdy.

«Munda júzege asyrylǵan tsıfrlandyrý jobasy «Smart Aqkol» dep atalady. «Aqyldy» qala qaýipsizdikten ekologııaǵa deıin 11 baǵyttan turady. «Smart Aqkol» anyqtaýdan saraptamaǵa deıingi baǵyttar boıynsha jumys isteıdi», - deıdi Marat Iǵalıev.

Búgingi tańda joba tótenshe jaǵdaılarda jedel áreket etetin jáne monıtorıng júrgizetin ahýaldyq ortalyq, talshyqty-optıkalyq baılanys jelisi, qala boıynsha Wi-Fi múmkindigi, jol qozǵalysyn baqylaıtyn avtomattandyrylǵan basqarý júıesi, qoǵamdyq oryndardy beınebaqylaý júıesi, Smart Building, kommýnaldyq qyzmetterdi keshendi esepteý júıesi, «aqyldy» jaryq shamdar, aýanyń lastanýyn anyqtaıtyn tetikter jáne qalanyń ınteraktıvti kartasynan turady.

«Aldymen qatysýshylar «bulttaǵy beınebaqylaý kamerasy» jobasy boıynsha turǵyn úılerdiń kire berisine beınekamera, esepteý quraldary ornatylǵan turǵyn úı aýlalarynda boldy. Mundaǵy málimetter tikeleı ahýaldyq ortalyqqa baryp túsedi. Bul Smart TKSh jelisi. Sonymen qatar, bul úıler (Smart-Building) ǵımarattyń saqtalýy men qaýipsizdigin qamtamasyz etetin qurylǵylarmen jabdyqtalǵan. Budan bólek qonaqtarǵa beınebaqylaý kamerasy jáne open Wi-Fi júıesimen jabdyqtalǵan smart-avtobýstar tanystyryldy», - dep atap ótti M.Iǵalıev.

«Tengri Lab» JShS ókilderi jobanyń «mıy» - málimetterdi qabyldaý jáne taldaý ortalyǵyn tanystyrdy.

«Búgin joǵaryda aıtylǵandardan bólek, Aqkól qalasynyń barlyq ashyq málimetteri biriktirilip otyr. Jaqynda jedel járdem qyzmeti jumys isteıtin «Adis» baǵdarlamasynyń málimetteri de osy júıege biriktirildi. Osy arqyly jedel járdem qyzmetine búgingi tańda qansha qońyraý shalynǵanyn anyqtaýǵa bolady. Engizilgen osy tehnologııalar arqyly Aqkól qalasyn «smart city» tujyrymdamasyna jazylatynyn senimmen aıtýǵa bolady», - dep tolyqtyrdy Aqmola oblysy ákimniń orynbasary.