Oblys ákimderi tyńaıtqysh satyp alýǵa bólingen bıýdjet qarjysyn tıimsiz paıdalanýda
Bul jaıynda búgin QR Aýyl sharýashylyǵy birinshi vıtse-mınıstri Qaırat Aıtýǵanov málim etti, dep habarlaıdy QazAqparat.
«2016 jyldyń qorytyndysy boıynsha, mıneraldy tyńaıtqyshtar qoldaný kólemi 260,9 myń tonnany qurady. Bul 2015 jylǵy deńgeıden 30 myń tonnaǵa nemese 10 paıyzǵa kem. 2017 jyly 277,1 myń tonna mıneraldy tyńaıtqysh satyp alý josparlanǵan. Bul da 2015 jylǵy kórsetkishten 5 paıyzǵa tómen bolyp otyr. Mundaı jaǵdaı oblys ákimderiniń jyl saıyn tyńaıtqysh satyp alýǵa bólingen bıýdjet qarjysyn sýbsıdııalaýdyń basqa baǵyttaryna berip jiberýinen oryn alýda», - dedi Aıtýǵanov.
Máselen, onyń dereginshe, 2017 jyly Qostanaı oblysynyń ákimdigi tyńaıtqyshtardy sýbsıdııalaýǵa 513,6 mln. teńge qarastyryp otyr. Al bul 2014 jylǵy qarjy kóleminen 45 paıyzǵa kem. Aqmola oblysynyń ákimdigi bolsa jergilikti bıýdjetten aǵymdaǵy jylǵa 1,6 mlrd. teńge qarjy bólmek. Ol da 2015 jylǵy bólingen qarjydan 24 paıyzǵa az bolyp otyr.
«Oblys ákimdikteri aýyl sharýashylyǵy daqyldarynyń ónimdiligin arttyrý jáne topyraqtyń qunarlyǵyn saqtaý úshin mıneraldy tyńaıtqyshtardy arzandatýǵa arnalǵan bıýdjet qarjysynyń basqa maqsattarǵa bólinýine jol bermeýi tıis", - dedi birinshi vıtse-mınıstr.