Oblys ákimderi Premer-Mınıstrge jalaqy qaryzdarynyń tólenýi boıynsha esep berdi
ASTANA. QazAqparat - QR Premer-Mınıstri Kárim Másimov oblys ákimderine kásiporyndardaǵy jalaqy qaryzdarynyń tólenýi boıynsha máseleni óz baqylaýlaryna alýdy tapsyrdy. Úkimet otyrysy kezinde ákimder atalǵan máselege qatysty aǵymdaǵy jaǵdaıdy baıandady. Barlyq oblystarda jaǵdaı turaqty baqylaýǵa alynǵan.
Aqmola oblysynda jalaqynyń tólenýi boıynsha jalpy qaryz kólemi 242 mln teńgeni quraıdy.
«Bul qaryz 4 kásiporynǵa qatysty, bankrot bolǵan 2 kásiporyn boıynsha qaryz kólemi - 198 mln teńge, 29,7 mln teńge - aǵymdaǵy qaryz kólemi, 14,9 mln teńge - merzimi ótip ketken qaryz», - dedi ákim Sergeı Kýlagın.
Aqmola oblysynyń ákiminiń aıtýynsha, atalǵan másele aımaq basshysynyń jáne quqyq qorǵaý organdarynyń baqylaýyna alynǵan.
«Bizde bir servıstik kompanııanyń 11,7 mln teńge somasy kólemindegi qaryzy bar. Bul kompanııamen jumys istep jatyrmyz, jumys toby quqyq qorǵaý organdarymen birlesip máseleni turaqty baqylaýda ustap otyr», - dep esep berdi Aqtóbe oblysynyń ákimi Berdibek Saparbaev.
Almaty oblysynda merzimi ótip ketken qaryz kólemi 9,6 mln teńgeni quraǵan.
«Olar - bankrot bolǵan 5 kásiporyn, múlki satylǵan soń qyzmetkerlerge jalaqy tólenedi. Jalpy alǵanda, qaryz kólemi 25,8 mln teńgeni quraıdy», - dep atap ótti oblys ákimi Amandyq Batalov.
Eske salaıyq, Úkimettiń ótken otyrysynda densaýlyq saqtaý jáne áleýmettik damý mınıstri Tamara Dúısenova jyl basynan beri memlekettik eńbek ınspektorlary Qazaqstan kásiporyndary boıynsha 2,8 mlrd teńge jalaqy qaryzyn anyqtaǵanyn aıtty. Onyń 2,4 mlrd teńgesi ótelgen. Óz kezeginde, Kárim Másimov ákimdikter men beıindi vedomstvoǵa atalǵan máseleni baqylaýǵa alýdy tapsyrdy, dep jazady Pm.kz.
