Oblys ákimderi kóktemgi egis naýqanyndaǵy qıyndyqtar týraly aıtty

NUR-SULTAN. QazAqparat – Úkimet otyrysynda oblys ákimderi kóktemgi egis naýqany kezinde tap bolyp jatqan qıyndyqtar týraly aıtty, dep habarlaıdy QazAqparat tilshisi.

Soltústik Qazaqstan oblysynyń ákimi Qumar Aqsaqalovtyń aıtýynsha, óńirdegi fermerler tyńaıtqysh pen ımporttyq tehnıkanyń qosalqy bólshekteriniń qymbattaýynan qıyndyqtar sezine bastaǵan.

«Búginde óńir dıqandaryna tyńaıtqyshtar qorǵaý quraldary men qosalqy bólshekterdiń 2-3 ese qymbattaýy qıyndyqtyqtar týǵyzýda. Ónimdiligi joǵary ımporttyq tehnıkany qosalqy bólshektermen qamtamasyz etýge erekshe kóńil bólip jatyrmyz. Kýrs aıyrmashylyǵynan baǵanyń óskeni baıqalady. Jaǵdaıdy baqylaý úshin kóktemgi egis jumystaryn júrgizý boıynsha jedel shtab quryldy. Ol shtab týyndaǵan problemalardy jyldam sheshýge jumys isteıdi», - dedi aımaq basshysy.

Túrkistan jáne Jambyl oblystarynyń ákimderi de tyńaıtqyshtyń qymbattaýy problema bolyp turǵanyn atady.

«Byltyr bıýdjetti qalyptastyrý barysynda bıylǵa 112,5 myń tonna mıneraldyq tyńaıtqyshtyń qunyn sýbsıdııalaýǵa 4,5 mlrd teńge qarastyrylǵan bolatyn. Alaıda qazir, ózińiz de aıtqandaı, tyńaıtqyshtardyń baǵasy 2,5 ese kóterildi. Sondyqtan, bul qarjy jetkilikti bolmaıyn dep tur. Mınıstrlikpen birge otyryp sóılestik. Jalpy jergilikti qoımalarda tyńaıtqysh bar. Biraq qymbat bolyp tur. Sol másele sheshimin tapsa, durys bolar edi», - dedi Túrkistan oblysynyń ákimi Ómirzaq Shókeev.

Al Jambyl oblysynyń dıqandary ázirge 52 myń tonna tyńaıtqysh alý týraly kelisimshart jasaǵan eken.

«Jańa ǵana áriptesterimniń, ózińizdiń aıtqanyńyzdy qoldaımyz. Baǵa 2,5 ese ósip ketti. Osyǵan bir Úkimet tarapynan qoldaý bolsa», - dedi oblys ákimi Berdibek Saparbaev.

Eske salsaq, Premer-Mınıstr tyńaıtqysh baǵasynyń 2 esege ósýin synǵa alǵan edi.