Oblysymyzda qaterdiń beti qaıtqan joq — Ashat Shaharov
AQTÓBE. KAZINFORM — Aqtóbede 792 úıdi sý basty, 8978 adam qaýipsiz jerge kóshirildi. Oblysymyzda qaterdiń beti qaıtqan joq. Bul týraly Ashat Shaharov áleýmettik jelidegi paraqshasynda habarlady.
Aqtóbe oblysyndaǵy sý tasqyny ótken aptada bastaldy. Aldymen Aqtóbe qalasy men Baıǵanın, Temir aýdandarynda qaýip kúsheıip, joldy sý basty, úıge sý kirdi. Keıin Qobda, Oıyl, Áıteke bı, Muǵaljar aýdandarynda sý deńgeıi kóterilip, tótenshe jaǵdaı jarııalandy.
— Óńirimizge tóngen apat birneshe kúnnen beri ábigerge salyp jatyr. Tasqynǵa tosqaýyl bolý úshin jeke quramnan 3140 adam, 664 tehnıka, jalpy barlyq kúsh jumyldyryldy. Oblysymyzda qaterdiń beti qaıtqan joq. Demek, bosańsýǵa áli erte degen sóz. Qolda bar derekke súıensek, óńirde 792 úıdi sý basty. 8 978 adam qaýipsiz jerge kóshirildi. Oblystyń 5 aýdanynda, Qobda, Muǵaljar, Temir, Áıteke bı, Oıyl jáne Aqtóbe qalasynda jergilikti aýqymdaǵy tabıǵı sıpattaǵy tótenshe jaǵdaı jarııalandy. Qaýipti aımaqtarda sý sorý, tazalaý, toqtatý jumystary úzdiksiz júrgizile beredi. Bul kúreste turǵyndardyń qosqan úlesi zor. Uıymshyldyqpen iske kiriskenimiz — kúshimizdiń birlikte ekendiginiń dáleli, — dedi Aqtóbe oblysynyń ákimi Ashat Shaharov.
Onyń aıtýynsha, qazirgi kezde komıssııa qurylyp, shyǵyn men keltirilgen zalal eseptelip jatyr.
— Japa shekkenderdiń shyǵyny túgel derlik óteledi. Úı-jaılaryn qalypqa keltirip, basqa da qajettilikterin tolyq qamtamasyz etemiz. Prezıdent muny qatań baqylaýǵa aldy. Óńirimizge Memleket basshysynyń tapsyrmasy boıynsha Premer-mınıstr Oljas Bektenov keldi. Aımaqtaǵy ahýaldy áýeden kórip, sý qoımalarynyń búgingi kúıimen tanysty. Ahýaldyq ortalyqqa bardy. Respýblıkalyq shtab otyrysynda da halyqqa kómek máselesin jan-jaqty talqyladyq. Qymbatty jerlester, ár otbasynyń muń-muqtajyn nazarǵa alamyz. Syn saǵatta sabyrlyq tanytqan sizderge amandyq tiledim, — dep jazdy Ashat Shaharov.
