Jambyl oblysy ákimi veterınarlarǵa 50 qyzmettik avtokóliktiń kiltin tabystady
TARAZ. KAZINFORM – Jambyl oblysy Baızaq aýdany Qosaq aýylynda ótken is-sharaǵa QR Parlamenti Májilisiniń depýtattary, Sý resýrstary jáne ırrıgatsııa, Aýyl sharýashylyǵy mınıstrliginiń ókilderi jáne respýblıkanyń basqa óńirlerinen kelgen veterınarlar qatysty.
2025 jyly veterınarııa salasyn damytýǵa 4,6 mlrd teńge (2024 jyly – 4,2 mlrd teńge) bólindi. Salada 1 055 maman eńbek etedi desek, sońǵy eki jylda jumysshylardyń jalaqysy 30 paıyz ósti. Keıingi 3 jylda 17 bıotermııalyq shuńqyr salynyp, úsheýi jóndeýden ótti.
Veterınarlar 160 dana termosómkemen qamtamasyz etildi. Endi maýsymdyq qyzmettik kıim satyp alý kózdelip otyr. Bıyl biryńǵaı jańa tıptik úlgidegi 40 veterınarııalyq pýnkttiń qurylysyn júrgizý josparlanǵan, onyń 20-sy demeýshiler esebinen salynyp jatyr. Jalpy, tozyǵy jetken pýnkt ǵımarattarynyń máselesi 2025-2026 jyldary aralyǵynda tolyq sheshimin tappaq.
– «Medıtsına adamdy, veterınarııa adamzatty emdeıdi» degen naqyl sóz eshqashan ózektiligin joıǵan emes. Memleket basshysy maldyń juqpaly aýrýlaryna qatysty ahýaldy, onyń ishinde ekpe egý máselesin erekshe baqylaýda ustaýdy tapsyrǵan bolatyn. Sebebi mal sharýashylyǵyn damytý múmkindikteri men onyń eksporttyq áleýeti veterınarııa salasyna tikeleı baılanysty. Jańa qyzmettik avtokólikter – sapaly qyzmet kórsetýdiń negizi men kepili, – degen Erbol Qarashókeev epızootııalyq turaqtylyqty qamtamasyz etý jolynda aıanbaı eńbek etip kele jatqan sala mamandaryna alǵys bildirdi.
Saltanatty is-shara barysynda Parlament Májilisiniń depýtaty, Agrarlyq máseleler komıtetiniń tóraǵasy Serik Egizbaev pen Aýyl sharýashylyǵy vıtse-mınıstri Amanǵalı Berdalın quttyqtaý sóz sóıledi.
Birqatar azamat óńirdiń órkendeýine eleýli úles qosqany úshin «Qurmet» ordeni, QR Aýyl sharýashylyǵy mınıstrliginiń «Eńbek ardageri» jáne «Aýyl sharýashylyǵy salasynyń úzdigi» tósbelgilerimen, sondaı-aq Qurmet gramotasymen saltanatty túrde marapattaldy.
Aıta keteıik, Almatyda jedel veterınarııalyq kómek iske qosyldy.