Oblys ákimi: Alakóldi damytýdyń bas jospary ázirlenip jatyr
ASTANA. KAZINFORM — Bıyl Alakól jaǵalaýynda demalýshylar úshin qolaıly jaǵdaı jasap, ınfraqurylymyn damytý boıynsha naqty sharalar qabyldandy. Bul týraly Ortalyq kommýnıkatsııalar qyzmetiniń brıfınginde Abaı oblysynyń ákimi Berik Ýálı habarlady.
Prezıdent tapsyrmasyna sáıkes oblysta týrıstik ınfraqurylymdy damytýǵa baǵyttalǵan aýqymdy jobalardy júzege asyrý jalǵasady. Maqanshy aýdany aýmaǵynda ornalasqan Alakól kóli aıtarlyqtaı týrıstik jáne ınvestıtsııalyq áleýetke ıe.
Oblys qurylǵaly jaǵalaýda jóndeý júrgizilmegenin eskere otyryp, jergilikti bıýdjetten 1 mlrd teńge bólindi. Kól jaǵalaýyndaǵy Qabanbaı aýylynda qutqarý stantsııasy jáne órt sóndirý deposynyń qurylysy bastaldy. Qazirgi ýaqytta týrıstik aımaqqa jańa elektr jelisin tartý, qatty turmystyq qaldyqtar polıgonyn salý boıynsha jobalyq-smetalyq qujattama ázirlenip jatyr. Jobalardy júıeli túrde jáne sapaly iske asyrý úshin kól jaǵalaýynyń jańa bas josparynyń jobasyn ázirleý josparlanyp otyr.
— Joba aıasynda jalpy aýdany 1 000 gektardan asatyn demalys jáne týrızm aımaqtaryn qalyptastyrý, sondaı-aq rekreatsııalyq, qoǵamdyq-iskerlik jáne turǵyn aýmaqtardy damytý kózdelgen. Sonymen qatar, kóliktiń qoljetimdiligi, ınjenerlik ınfraqurylymmen qamtamasyz etý jáne ekologııalyq turaqtylyq máselelerine basa nazar aýdarylady, — dedi oblys ákimi.
Bas jospardy ázirleý birneshe strategııalyq mindetterdi sheshýge baǵyttalady. Onyń ishinde ishki týrızmdi damytý, ınvestıtsııa tartý, jańa jumys oryndaryn ashý, óńir turǵyndary men qonaqtarynyń demalys jaǵdaıyn jaqsartý.
Atalǵan jobany júzege asyrý nátıjesinde Qabanbaı aýyly men Alakól jaǵalaýynyń aýmaqtary biriktirilip, ıgerilgen aımaq kólemi 3 myń gektarǵa deıin ulǵaıtylady. Bul óz kezeginde Alakóldi óńirdiń jetekshi týrıstik ortalyqtarynyń birine aınaldyrýǵa múmkindik beredi.
Jaǵalaýdy damytýdyń negizgi baǵyttarynyń biri — Ázerbaıjan Respýblıkasy ınvestorlarynyń qatysýymen «Alakól» emdeý-saýyqtyrý keshenin salý jobasy. Bul joba boıynsha eki memlekettiń basshylary 21 qazan kúni kelisimge qol qoıdy. Qazirgi ýaqytta qurylys ornyn bekitý jumystary júrgizilip jatyr.