Obyr, qant dıabeti, júrek aýrýlary: kimge qandaı skrınıng qoljetimdi
ASTANA. KAZINFORM - Skrınıng – aýrýlardy erte anyqtaýǵa arnalǵan profılaktıkalyq tekserý. Qazaqstanda negizgi skrınıngtik tekserýler azamattardyń MÁMS mártebesine qaramastan, memlekettiń áleýmettik kepildikteriniń esebinen júrgiziledi, dep habarlaıdy QR Densaýlyq saqtaý mınıstrliginiń baspasóz qyzmeti.
Qazaqstanda júrek-qan tamyrlary aýrýlaryn, qant dıabetin, glaýkomany, sút bezi obyryn, jatyr moıny obyryn, kolorektaldyq obyrdy, V jáne S vırýstyq gepatıtterin, sondaı-aq belgilengen ólshemsharttarǵa sáıkes basqa da aýrýlardy erte anyqtaý úshin skrınıngtik tekserýler júrgiziledi.
Júrek-qan tamyrlary aýrýlaryn, qant dıabetin jáne glaýkomany anyqtaýǵa arnalǵan skrınıngten 40–76 jas aralyǵyndaǵy erler men áıelder eki jylda bir ret ótedi.
Sút bezi obyryn erte anyqtaý úshin 40–76 jas aralyǵyndaǵy áıelder eki jylda bir ret mammografııadan ótedi.
Jatyr moıny obyryna arnalǵan skrınıng 30–74 jas aralyǵyndaǵy áıelderge júrgiziledi. Tekserýden tórt jylda bir ret ótý qajet.
Kolorektaldyq obyrǵa arnalǵan skrınıngten 50–76 jas aralyǵyndaǵy erler men áıelder eki jylda bir ret ótedi.
-Tirkelgen emhanańyzǵa habarlasyp, bıyl qandaı skrınıngtik tekserýlerden ótýge quqyly ekenińizdi naqtylańyz. Medıtsına qyzmetkerleri tekserýden ótý tártibin túsindirip, qajet bolǵan jaǵdaıda qosymsha zertteýlerge joldama beredi.
Aýrý belgileriniń paıda bolýyn kútpeńiz – tekserýden ýaqytyly ótińiz! Erte dıagnostıka emdeýdi der kezinde bastaýǵa jáne densaýlyqty saqtaýǵa múmkindik beredi.
Densaýlyǵyńyz – óz qolyńyzda!,-delingen habarlamada.
Osyǵan deıin el halqy qandaı mańyzdy skrınıngterden ótýi tıis ekeni týraly jazdyq.
