Obektıv ortaq, maqsat bir: Qazaqstan men Qytaı medıasynyń dostyq dıalogi
ASTANA. KAZINFORM — Jaqynda qytaılyq jýrnalıster Ortalyq Azııaǵa sapar shegip, aımaqtyń mádenıetimen, tarıhymen jáne turǵyndarynyń ómirimen tanysqan edi.
Jibek Joly arnasynyń «Búgin LIVE» stýdııasynda qonaq bolǵan CGTN telearnasynyń tilshileri erekshe saıahat jaıly áńgimelep berdi.
— «Ortalyq Azııa — Qytaı» sammıti qarsańynda biz osy aımaqtaǵy bes elge sapar shegýdi uıǵardyq. Maqsatymyz — Qytaı men Ortalyq Azııa memleketteri arasyndaǵy kelisimderdiń qalaı júzege asyp jatqanyn óz kózimizben kórý boldy. Sapardan keıin basshylyqqa arnaıy hat jazdym. Mundaı medıa jobalar mindetti túrde jalǵasyn tabýy tıis. Sebebi buryn biz bir-birimizden tek suhbat alsaq, bul joly eki eldiń jýrnalısteri birigip, ortaq joba jasady. Bul — kásibı ári mádenı turǵyda úlken tájirıbe. Eń bastysy — halyqtar arasyndaǵy dostyqty tereńdetýdiń tıimdi joly, — deıdi Shý Jaoshýn.
Al Jibek Joly arnasyndaǵy áriptesterimizben birlesip baǵdarlama túsirgen Ilın Chen joba barysynda alǵan áserimen bólisti.
— Biz Ortalyq Azııa elderin 20 kún araladyq. Almatyda Jibek Joly telearnasynyń ujymymen birge jumys istedik. Sol kúnderi The Spirit of Tengri etnofestıvaline qatystyq. Munda meni ásirese mýzykalar erekshe tánti etti — buryn-sońdy mundaı etno-mýzykalardy estimeppin. Biz tipti túsirilim kezinde bet-álpetimizdi etno stılde árledik. Bul da maǵan óte keremet áser qaldyrdy, — deıdi CGTN telearnasynyń tilshisi.
Ilın Chenmen birge Jibek Joly arnasynyń tilshisi Kúnsaıa Qurmet te halyqaralyq baǵdarlamanyń tizginin ustady. «Búgin LIVE» baǵdarlamasyna suhbat bergen áriptesimiz jobanyń túsirilimi qalaı ótkenin aıtyp berdi.
— Ilın Chen ekeýmiz birlesip ázirlegen baǵdarlamada Qazaqstan men Qytaı arasyndaǵy dostyq qarym-qatynas, elimizdiń mádenıeti men turmys-salty keńinen kórsetildi. Almatynyń kórkem jerlerin aralap, tabıǵatyn túsirdik. Qarapaıym turǵyndardan suhbat alyp, sol arqyly qazaq halqynyń bolmysyn, salt-dástúrin, qonaqjaılyǵyn tanytýǵa tyrystyq, — deıdi Kúnsaıa Qurmet.
Kórshi elden kelgen qonaqtar Qazaqstan týraly pikirlerin ortaǵa saldy.
— Men Qazaqstanǵa alǵash ret kelip turǵan joqpyn — buǵan deıin Shanhaı yntymaqtastyq uıymynyń sammıtine qatysqanmyn. Al áriptesterim úshin bul — alǵashqy sapar. Qazaqstan maǵan erekshe áser qaldyrdy. Ásirese, aýyl sharýashylyǵy men kóshpendiler mádenıeti qatty qyzyqtyrdy. Taǵy bir baıqaǵanym — munda qytaılyq týrıster kóp eken. Keıbiri ushaqpen kelse, keıbiri óz kóligimen shekaradan ótip, saıahattaýda. Bul — eki el arasyndaǵy yntymaqtastyqtyń aıqyn kórinisi, — deıdi Shý Jaoshýn.
Al Ilın Chen qazaqtardyń qonaqjaılyǵyna tánti bolǵanyn jetkizdi.
— Sapar kezinde Qazaqstan men Qytaıdyń ózara baılanysynyń qanshalyqty tereń ekenin túsindim. Biz munda kólikpen keldik. Jol boıy aýyldarǵa da, qalalarǵa da toqtadyq. Turǵyndar bizben ózderi kelip, áńgimeleskisi kelip turady. Bizben «Nıhao» dep amandasady. Mundaǵy halyq Qytaı týraly kóp aqparattan habardar eken. Qazaqstanda adamdar óte qonaqjaı, ashyq-jarqyn, — deıdi qytaılyq tilshi.
Qytaılyq áriptesterimiz elderine óte qundy estelikti alyp bara jatqandaryn tilge tıek etti.
— Biz jol boıy kezikken adamdardan bir paraqqa estelik retinde tilekter, qoltańbalar jazýyn ótindik. Bul qaǵaz — endi bizdiń saıahatymyzdyń eń qymbat jádigerine aınaldy. Meniń áriptesim Kúnsaıa sol paraqqa «Alystaǵy týystan jaqyndaǵy kórshi artyq» degen qazaq maqalyn jazypty. Qytaıda da dál osyndaı naqyl sóz bar. Osyndaı ortaq jobalar — elder arasyndaǵy tarıhı, mádenı kópirdi qaıta jańǵyrtýdyń, tipti dostyqty odan ári nyǵaıtýdyń tamasha joly, — deıdi Ilın Chen.
Al Shý Jaoshýn bul esteliktiń qaıda saqtalatynyn aıtty.
— Ekspedıtsııa barysynda jınaǵan jazbalarymyz CGTN arnasynyń mýzeıine tapsyrylady. Bul — bizdiń Ortalyq Azııadaǵy eń qundy esteligimiz, — deıdi ol.
Aıta keteıik, kúni keshe «Ortalyq Azııa — Qytaı» sammıtiniń Astana deklaratsııasyna qol qoıyldy.
Odan bólek Qytaı Ortalyq Azııanyń 5 eline 1,5 mlrd ıýan qaıtarymsyz kómek usynbaq.
Al «Ortalyq Azııa — Qytaı» sammıti endi eki jyldan keıin Beıjińde ótedi.