Talǵar men Qarasaı aýdandarynyń taýdaǵy jer telimderi Almaty ákimdigine qalaı ótip ketken
ASTANA. KAZINFORM — Premer-mınıstr Oljas Bektenov Májilis depýtaty Baqytjan Bazarbektiń Almaty mańyndaǵy zańsyz qurylystar týraly saýalyna jaýap berdi.
— Taýly aımaqtaǵy jer telimderin Almaty oblysynyń Talǵar jáne Qarasaı aýdandarynyń ákimdikteri Almaty qalasynyń shekarasyna 1998-2014 jyldary QR Prezıdentiniń Jarlyǵy boıynsha ótkizgen. 2021 jyldan qazirge deıin taýly aımaqtan jer telimderi eshkimge berilgen joq. Kórsetilgen 25 jer telimi boıynsha Almaty qalasy jer resýrstaryn basqarý departamenti jer zańnamasyn buzý faktisi boıynsha tekserý júrgizip jatyr. Jer telimderin berýdiń qanshalyqty zańdy bolǵany, ondaı sheshimderdiń negizdiligi osy tekserýlerden keıin belgili bolady. Odan bólek Almaty qala qurylysy basqarmasy zań buzǵandarǵa qarsy qajetti ákimshilik sharalardyń bárin qabyldap jatyr. Onyń ishinde tıisti uıǵarymdar men, aıyppuldar, zańsyz qurylystardy súrip tastaý týraly talap aryzdar da bar, — dep jazylǵan Úkimet basshysynyń jaýabynda.
Sondaı-aq Oljas Bektenov depýtattyq saýalda atalǵan ár nysan boıynsha jeke-jeke aqparat berip, Baqytjan Bazarbek keltirgen faktilerdiń rastyǵyn ishinara moıyndaǵan.
— Almatydaǵy taý jotalaryn kesip tegisteý faktilerine kelsek, Ádilet departamentiniń óndirisinde taý bókterindegi zańsyz nysandardy súrip tastaý týraly 35 atqarý isi jatyr. Onyń ishinde 20-sy atqarylǵan (57%). Keıbir nysandar tolyqtaı súrilse, keıbiri ishinara qulatylǵan. Qazir 15 is áli atqarylý satysynda tur. Onyń ekeýinde boryshkerler zańsyzdyqtardy óz kúshimen joıýǵa mindettelse, 13 iste májbúrlep atqarý sharasy qabyldanyp jatyr, — deıdi Premer-mınıstr.
Oljas Bektenov depýtattyń saýalda keltirilgen ózge málimetter boıynsha qosymsha tekserý bastalǵanyn da jazady.
Eske salsaq, Májilis depýtaty Baqytjan Bazarbek Bas prokýror Berik Asylovtyń atyna saýal joldap, Almaty irgesindegi quıqaly telimderdi túgendeýdi talap etken edi.
