Úkimet basshysy Sarandaǵy jaǵdaı týraly: Kináliler qylmystyq jaýapkershilikke tartylady

ASTANA. KAZINFORM – Premer-mınıstr Oljas Bektenov Úkimet otyrysynda Saran qalasyndaǵy jylý júıesiniń aqaýyna jol bergen adamdar jaýapqa tartylatynyn aıtty.

«Búgin bárin aıaqtaý qajet. Birinshi kezekte bul Saran qalasy ákiminiń jeke jaýapkershiligi jáne oblys ákimdigi tarapynan tıisti baqylaýdyń joqtyǵy. Meniń tapsyrmam boıynsha qazir tekserý júrip jatyr. Jylý beretin nysannyń daıyndyǵy týraly jalǵan aqparat bergen adamdardyń bári jaýapqa tartylady. Osy otyrystan keıin Energetıka mınıstri Saran qalasyna baryp, bárin ózi tekseredi. Nátıjesi boıynsha materıaldardy quqyq qorǵaý organdaryna jiberemiz. Eger qylmystyq quram bolsa, kináli adamdardyń bári qylmystyq jaýapkershilikke tartylady», - dedi Premer-mınıstr.

Qaraǵandy oblysynyń ákimi Ermaǵanbet Bólekpaevtyń aıtýynsha, shaharǵa búgin tolyq jylý beriledi.

«Saran jańa ortalyq qazandyǵynda 4 qazandyq ornatyldy. 13 qazanda №1 qazandyq iske qosyldy jáne táýlik ishinde shyǵatyn temperatýra 55 gradýs boldy. 13 qazanda qazandyq tómen qaınaǵan qabat pen nasos jabdyǵy avtomatıkasynyń durys jumys istemeýine baılanysty májbúrli túrde toqtatyldy. Rejımdik baptaý jumystary jalǵasyp jatyr. Aqaýlardyń shyǵýyna baılanysty jylýmen jabdyqtaýdy rezervtik shemaǵa kóshirý týraly sheshim qabyldandy. 124 úı rezervtik jylytýǵa qaıta qosylyp, jylý berilip jatyr. Búgingi kúnniń sońyna deıin barlyq úılerge jylý beriledi», - dedi ákim.

Eske salsaq, eldiń basym bóliginde kún sýyǵan kezde Qaraǵandy oblysynyń Saran qalasynda jylý júıesinen aqaý shyqqan bolatyn.