Obamaǵa ýly hat jibergen Tehas aktrısasyna úkim shyǵaryldy
ASTANA. QazAqparat - AQSh soty amerıkandyq Tehas shtatynyń turǵyny, burynǵy aktrısa Shennon Rıchardsonǵa kisi óltiretin qaýipti úpilmálik ýyn daıyndaǵany jáne onymen AQSh prezıdenti Barak Obama men Nıý-Iorktiń burynǵy meri Maıkl Blýmbergke hat jibergeni úshin 18 jylǵa túrmede otyrýǵa úkim shyǵardy, dep habarlady ITAR-TASS.
36 jastaǵy Rıchardson 2013 jylǵy 7 maýsymda Lýızıana shtatyndaǵy Shrıvport qalasynan shamamen 160 shaqyrym jerdegi Nıý-Bostonda ustaldy, hat mamyr aıynda osy jerden jiberilgen bolatyn. Onda prezıdenttiń jáne burynǵy qala basshysynyń atyna olardyń otty qarýlar aınalymyna baqylaý týraly máseledegi qatań ustanymyna baılanysty qoqan-loqqy jasaǵan.
Prokýorlardyń aıtýynsha, tutqyndalǵanǵa deıin aktrısa óziniń kinásin kúıeýine aýdarýǵa tyrysyp, polıtsııaǵa onyń kompıýterinen úpilmálik ýyn jasaý ádisi, sondaı-aq Obama men Blýmberg týraly aqparattardy taýyp alǵanyn habarlaǵan. Alaıda áıel detektordaǵy testide jalǵan sóılegeni anyqtalyp, ótirigi shyǵyp qaldy.
Ótken jyldyń jeltoqsanynda alty balanyń anasy Rıchardson óziniń aıybyn moıyndap, tergeýmen mámilege keldi, sonyń arqasynda ol budan da uzaq merzimge jazaǵa tartylýdan qutylyp ketti.
