Obama Tramptyń memleketke opasyzdyq jasady degen málimdemesin joqqa shyǵardy
ASTANA.KAZINFORM — AQSh-tyń burynǵy prezıdenti Barak Obamanyń ókili Donald Trampty óziniń aldyndaǵy prezıdentti 2016 jáne 2020 jyldardaǵy «satqyndyq jasady» jáne saılaýdy burmalady dep aıyptaǵannan keıin synǵa aldy, dep habarlaıdy NBC News.
— Prezıdent apparatyna degen qurmetpen biz ádette Aq úıden shyǵatyn sandyraq pen jalǵan aqparatqa jaýap bere bermeımiz. Biraq osy jolǵy málimdemege jaýap berýimizge týra keldi. Bul oǵash aıyptaýlar kúlkili ári nazar aýdartýdyń álsiz áreketi, — dedi Obamanyń baspasóz hatshysy Patrık Rodenbýsh.
Seısenbi kúni Tramp Obamany saılaýdy burmalaýǵa tyrysty dep aıyptady.
— Olardyń maǵan jasaǵanynan keıin, bunyń durys-burystyǵyna qaramastan jurttyń kózin ashatyn kez keldi. Obama birden ustaldy. Olardyń 2016 jáne 2020 jyldary istegenderi — naǵyz qylmys. Bul joǵary dárejeli qylmys. Ol - qylmysker. Bul opasyzdyq boldy, — dedi Donald Tramp.
Tramp Ulttyq barlaý dırektory Týlsı Gabbard pen Ortalyq barlaý qyzmetiniń dırektory Djon Retklıfftiń áleýmettik medıa men teledıdardaǵy málimdemelerine silteme jasap, olar Obama ákimshiliginiń sheneýnikteri barlaý málimetterin qoldandy jáne Tramptyń 2016 jylǵy saılaýdaǵy jeńisiniń zańdylyǵyna nuqsan keltirý úshin sóz baılasty dep sanaıdy.
Gabbard áleýmettik jelide Ádilet departamentine qylmystyq is qozǵap jatqanyn jarııalady.
Kongreste respýblıkashyldarmen kezdesýinde Tramp Gabbardty maqtap, Obamany saılaýdy burmalaýǵa qatysty dep taǵy da aıyptady.
— Bul qatygez, sumdyq adamdar, — dedi ol burynǵy prezıdent jáne basqalar týraly.
Buǵan deıin Tramp Obamany 2016 jylǵy saılaýdy buzdy dep aıyptaǵan.
Tramp sonymen qatar burynǵy prezıdent Djo Baıden men onyń kómekshilerine qatysty tergeý júrgizýge buıryq berdi.