Obama prezıdenttik merzimi aıaqtalǵannan keıin de Qazaqstanmen yntymaqtastyqqa ázir

ASTANA. QazAqparat - Qazaqstan Prezıdenti Nursultan Nazarbaev G20 sammıti aıasynda Amerıka Qurama Shtattarynyń Prezıdenti Barak Obamamen kezdesti, dep habarlaıdy Aqordanyń baspasóz qyzmeti.

Kezdesý barysynda taraptar birqatar mańyzdy salalardaǵy ekijaqty ózara is-qımyldyń qazirgi jaǵdaıy men damý perspektıvalaryn talqylady.

Eki eldiń kóshbasshylary halyqaralyq kún tártibindegi ózekti máseleler jóninde de pikir almasty.

Memleket basshysy N.Nazarbaev B.Obamanyń prezıdenttigi kezinde eki el arasyndaǵy yntymaqtastyq kóptegen baǵyttar boıynsha, sonyń ishinde ıadrolyq qarýdy taratpaý jáne qarýsyzdaný salasynda jańa deńgeıge kóterilgenin atap ótti.

B.Obama Nursultan Nazarbaevtyń Amerıka Qurama Shtattary úshin jaqyn dos jáne senimdi seriktes ekenin aıtyp, óziniń prezıdenttik merzimi aıaqtalǵannan keıin de ózara tyǵyz is-qımyl jasaýǵa ázir ekenin jetkizdi.

Kezdesý sońynda Qazaqstan Prezıdenti AQSh Prezıdenti B.Obamany elimizge saparmen kelýge shaqyrdy.